नंदुरबार l प्रतिनिधी-
वाढत्या इलेक्ट्रॉनिक कचऱ्यामुळे निर्माण होणाऱ्या पर्यावरणीय समस्यांवर उपाय शोधण्यासाठी श्रीमती हि. गो. श्रॉफ हायस्कूल व कनिष्ठ महाविद्यालयात ई-कचरा जनजागृती व संकलन अभियानाचे उद्घाटन उत्साहात पार पडले. या कार्यक्रमाचे उद्घाटन शाळेचा प्राचार्या सुषमा शाह यांच्या हस्ते करण्यात आले.
“ई-यंत्रण 2025” उपक्रमांतर्गत सहभाग:
नंदुरबार डिस्ट्रिक्ट डेव्हलपमेंट कौन्सिल व पूर्णम इकोविजन फाउंडेशन पुणे यांच्या संयुक्त विद्यमाने “ई-यंत्रण 2025” हा जिल्हास्तरीय उपक्रम राबवण्यात येत आहे. या उपक्रमाला प्रतिसाद देत श्रीमती हि. गो. श्रॉफ हायस्कूलने आपली नोंदणी करून शाळेत ई-कचरा संकलन केंद्र उभारले आहे. या केंद्रातून विद्यार्थ्यांना ई-कचरा संकलन, व्यवस्थापन, आणि त्याच्या सुरक्षित विल्हेवाटीचे महत्त्व समजावले जात आहे.
विद्यार्थ्यांचा उत्साही सहभाग:
सदर अभियानात शाळेच्या विद्यार्थ्यांनी मोठ्या उत्साहाने सहभाग घेतला. त्यांनी आपल्या घरातून ई-कचरा आणून संकलन केंद्रात जमा केला. विशेष म्हणजे, इयत्ता नववीच्या विद्यार्थ्यांनी गट तयार करून शहरातील विविध शहरी वस्तीत जाऊन ई-कचऱ्याबाबत जनजागृती केली आणि मोठ्या प्रमाणात ई-कचरा गोळा केला. त्यांच्या या उपक्रमामुळे शाळेला अधिक प्रमाणात कचरा संकलित करता आला.
ई-कचऱ्याचे संकट आणि त्यावरील उपायांची आवश्यकता:
कार्यक्रमादरम्यान शाळेच्या प्राचार्या सुषमा शाह यांनी ई-कचऱ्याचे मानवी आरोग्य व पर्यावरणावर होणारे गंभीर परिणाम समजावून सांगितले. त्यांनी स्पष्ट केले की ई-कचऱ्यामध्ये शिसे, पारा, क्रोमियम, कॅडमियम, कोबाल्ट, आणि निकेल यासारखे विषारी रसायने असतात. हे रसायने माती, पाणी आणि हवेच्या प्रदूषणाला कारणीभूत ठरतात. त्यामुळे यावर शास्त्रीय पद्धतीने पुनर्वापर आणि विल्हेवाट लावणे काळाची गरज आहे.
शिक्षकांचा पाठिंबा आणि मार्गदर्शन:
शाळेतील शिक्षकांनी विद्यार्थ्यांना मार्गदर्शन करत त्यांना या अभियानासाठी प्रेरित केले. शाळेच्या सर्व शिक्षकांनी या उपक्रमासाठी स्वयंसेवक म्हणून योगदान दिले. त्यांनी विद्यार्थ्यांना कचऱ्याचे प्रकार, त्याचे वर्गीकरण आणि त्यावरील पुनर्वापर प्रक्रियेबाबत सखोल माहिती दिली.
कार्यक्रमाचे संयोजन आणि पुढील उद्दिष्टे:
या कार्यक्रमाचे संयोजन शाळेतील विज्ञान विषय शिक्षक राजेंद्र मराठे यांनी केले. त्यांनी पर्यावरण संवर्धनाचा संदेश दिला.
हा उपक्रम पर्यावरण संवर्धनासाठी एक महत्त्वपूर्ण पाऊल आहे. ई-कचरा योग्य प्रकारे व्यवस्थापित करून पर्यावरणाचे रक्षण करणे आणि भविष्यातील पिढ्यांसाठी स्वच्छ आणि सुरक्षित पर्यावरण निर्माण करणे हे या उपक्रमाचे मुख्य उद्दिष्ट आहे असे नमूद केले.
विद्यार्थ्यांनी दाखवलेल्या उत्साहामुळे हा उपक्रम अधिक प्रभावी ठरला असून, त्यांच्यातील पर्यावरणीय जाणीव अधिक मजबूत करण्यासाठी शाळा भविष्यात असे उपक्रम सातत्याने राबविण्यात येतील असे शाळेच्या प्राचार्यांनी सांगितले.
कार्यक्रमास उपमुख्याध्यापक राजेश शाह पर्यवेक्षिका सीमा पाटील पर्यवेक्षक भिकू त्रिवेदी उपस्थित होते. कार्यक्रम यशस्वीतेसाठी नितीन देवरे, चेतना पाटील, महेश पाटील, नरेंद्र सूर्यवंशी, नरेंद्र माळी, गीता महाजन, अनिल शाह, सुनील शाह, जगदीश वंजारी, मनीष सनेर, हेमचंद्र मराठे, शाळेचे विज्ञान विषय शिक्षक तसेच शिक्षक व शिक्षकेतर कर्मचारी यांनी परिश्रम घेतले.
