नंदुरबार । प्रतिनिधी
नंदूरबार येथील शास्त्री मार्केट परिसरात महसूल विभागाच्या अधिकाऱ्यांनी आज बुधवारी दुपारी दीड वाजेच्या सुमारास दोन दुकानांमध्ये अनाधिकृतपणे घरगुती सिलेंडर रिफिलिंग करणाऱ्यांवर छापा टाकून सिलेंडर व वजन काटे आणि गॅस भरणारी विद्युत मोटार असा मुद्देमाल जप्त करत दोन दुकानांना सिल केले आहे.
याबाबत अधिक माहिती अशी की,नंदूरबार शहरातील शास्त्री मार्केटजवळील गुड्डू गॅस रिपेरिंग व डिलक्स गॅस रिपेरिंग या दुकानात विविध कंपन्यांचे घरगुती सिलेंडर काळाबाजारात विक्रीसाठी आणि ग्राहकांना विकण्याचा व्यवसाय करत होते. महसूल विभागाच्या अधिकाऱ्यांनी आज बुधवारी दुपारी दीड वाजेच्या सुमारास येथे छापा टाकला असता यात विविध कंपनीचे भरलेले सिलेंडर यावेळी आढळून आले. यात इंडियन गॅस व एचपी गॅस या कंपनीचे एकुण 13 सिलेंडर आणि 3 इलेक्ट्रीक वजन काटे तसेच 1 गॅस भरणारी विद्युत मोटार असा मुद्देमाल हस्तगत करत दोन्ही दुकान सिल करण्यात आल्या आहेत. सर्व मुद्देमाल महसूलच्या अधिकाऱ्यांनी ताब्यात घेऊन पंचनामा करून नंदुरबार शहर पोलीस ठाण्यात गुन्हा दाखल करण्याचे काम सुरू होते. ही कारवाई महसूल विभागाचे पुरवठा निरीक्षक अधिकारी रमेश वळवी, पुरवठा निरीक्षक हर्षद नेरकर यांच्यासह पोलीस उपनिरीक्षक मुकेश पवार, सहाय्यक पोलीस निरीक्षक मोहिते, पीसी अनिल बढे, पांढारकर, विशाले मराठे, सादीक पठाण, दिलवर भिल, सुनिल वाकडे यांनी केली आहे.
