नंदुरबार l प्रतिनिधी
हिंदवी स्वराज्य संस्थापक श्री छत्रपती शिवाजी महाराज यांच्या जन्मोत्सवाचा पूर्वसंध्येला शिवसेना जिल्हा प्रमुख डॉ.विक्रांत दिलीपराव मोरे यांच्या संकल्पनेतून भव्य लेझर शोचे आयोजन करण्यात आले होते. नाट्य मंदिर परिसरातील शिवरायांच्या अश्वारूढ पुतळ्याच्या भोवती आकर्षक रंगीबिरंगी लेझर किरणांचा विद्युत रोषणाई परिसर झळकला होता.
गेल्या दोन वर्षांपासून कोरोना महामारीच्या कालावधीत सर्वच कार्यक्रमांवर निर्बंध आले होते. परंतु, आता कोरोणाची साथ ओसरल्यामुळे कार्यक्रमांमध्ये उत्साह दिसून येत आहे. डोळ्यांचे पारणे फेडणाऱ्या नयनरम्य, सप्तरंगांचा उधळण करणाऱ्या भव्य लेझर शोच्या माध्यमातून छत्रपती शिवाजी महाराजांच्या जागर करण्यात आला. शिवसेना जिल्हाप्रमुख डॉ.विक्रांत दिलीपराव मोरे यांच्या संकल्पनेतून आयोजित कार्यक्रमाप्रसंगी मोठी गर्दी उसळली होती.
रविवारी सायंकाळी नाट्य मंदिर परिसरातील शिवरायांच्या पुतळ्याच्या भोवती रंगीबिरंगी आकर्षक विद्युत रोषणाईने परिसर उजळून निघाला होता. लेझर शो पाहण्यासाठी शहरातील लहानांपासून मोठ्यांपर्यंत सर्वांनीच गर्दी केली होती.
अनेकांनी धरला ठेका
लेझर शो प्रसंगी शिव गीतांच्या तालावर अवघी तरुणाई बेधुंद होऊन कृत्य करतांना दिसून आली. यावेळी जिल्हाप्रमुख डॉ.विक्रम मोरे यांच्यासह कार्यकर्त्यांनी ठेका धरला होता.’ जय भवानी, जय शिवाजी छत्रपती शिवाजी महाराज की जय अशा घोषणा कार्यकर्त्यांनी दिल्या.
