नंदुरबार l प्रतिनिधी
कोरोना विरुध्दच्या लढ्यात प्रतिबंधात्मक लसीकरण हेच एकमेव महत्वपूर्ण शस्त्र ठरले आहे . कोरोनाची चौथी लाट येण्याची शक्यता वर्तविली जात असून या लाटेला प्रतिबंध करण्यासाठी १२ ते १४ वयोगटातील बालकांचे लसीकरण सुरु करण्यात येत आहे . या अंतर्गत जिल्ह्यातील ६० हजार ८७१ अपेक्षित बालकांना प्रतिबंधात्मक लस जिल्हाधिकारी मनीषा खत्री , जिल्हा परिषद मुख्य कार्यकारी अधिकारी रघुनाथ गावडे यांच्या मार्गदर्शनाखाली दिली जाणार आहे .
सद्यस्थितीत चीन आणि साउथ कोरिया या देशात कोरोनाचा उद्रेक वाढला असून भारतात चोैथ्या लाटेची शक्यता नाकारता येत नाही . त्यामुळे १२ ते १४ वर्षे वयोगटातील मुलांच्या लसीकरणाची मोहीम जिल्ह्यात राबवण्यात येणार आहे . जिल्ह्यात कोरोना सकारात्मक रुग्ण जरी कमी असली तरी कोविडच्या चौथ्या लाटेपासून लहान मुलांचे संरक्षण करणे गरजेचे आहे . म्हणून प्रत्येक पालकांनी ज्या मुलांचा जन्म १ जानेवारी २००८ ते १५ मार्च २०१० या कालावधीत झाला आहे अशी सर्व मुले लसीकरणासाठी पात्र राहणार आहेत त्यांचे लसीकरण करून घ्यावे . लसीकरण मोहिमेसाठी कोरोबवेक्स या लसीचे ६३ हजार ६०० डोस जिल्हा लस भांडार जिल्हा परिषद आरोग्य विभागास प्राप्त झाले आहे . जिल्ह्यात ग्रामीण व शहरी भागात एकूण ७४ लसीकरण केंद्र कार्यरत असणार आहेत . १२ ते १४ वर्षे वयोगटातील मुलांना या लसीचे दोन डोस दिले जाणार आहेत व यासाठी पहिल्या डोस नंतर २८ दिवसांनी लसीचा दुसरा डोस देण्यात येणार आहे . याबरोबरच ६० वर्ष व त्यावरील नागरिकांना प्रिकॉशन डोस देण्यात येणार आहे . तरी सर्व १२ ते १४ वर्ष वयोगटातील मुलामुलींचे जास्तीत जास्त लसीकरण करून घेणे तसेच दुसर्‍या डोसचे प्रलंबित लाभार्थ्यांनी स्वतःचे लसीकरण पूर्ण करून लसीकरणाची गती वाढवावी असे आवाहन जिल्हा प्रशासनामार्फत करण्यात येत आहे .
