आंबापाणी येथील एकाचा दगडाने ठेचून खून, दोन संशयीत आरोपींना अटक

शहादा  | प्रतिनिधी
शहादा तालुक्यातील आंबापाणी येथील एकाचा दगडाने ठेचून खून करण्यात आल्याची घटना रविवारी सायंकाळी घडली. याबाबत म्हसावद पोलीसात खुनाचा गुन्हा दाखल करण्यात येवून दोन संशयीत आरोपींना अटक करण्यात आली आहे.
याबाबत पोलीस सुत्रांनी दिलेल्या माहितीनुसार, रविवारी संध्याकाळी आंबापाणी ता.शहादा येथील टिल्या किल्या वळवी(४२) याला संशयीत आरोपी भास्कर जत्र्या पाडवी (३२) रा.मेंढावळपाडा रतनपूर, देविसिंग वेशा ठाकरे(१८)रा.रतनपूर ता.शहादा या दोघानी काहीही कारण नसताना घरातून बाहेर आणले. त्यास भुतेआकसपूर ते लिंबर्डी रस्त्यावर पुलाखाली आणून तोंडावर, डोक्यावर, हातावर दगडाने मारून त्याचा खून केला. याबाबत मयताची पत्नी लिलाबाई वळवी हीने म्हसावद पोलीसात फिर्याद दिल्याने संशयीत आरोपीविरोधात भादंवी ३०२, ३४ प्रमाणे गुन्हा दाखल करण्यात आला आहे. पुढील तपास म्हसावद पोलीस स्टेशनचे पोलीस निरीक्षक निवृत्ती पवार करीत आहेत.