नंदुरबार l प्रतिनिधी-
नंदुरबार येथील एस ए मिशन हायस्कूल व कनिष्ठ महाविद्यालयाच्या फुटबॉलपटूंनी जिल्हास्तरीय सुब्रोतो मुखर्जी फुटबॉल स्पर्धेत घवघवित यश संपादन केले आहे. शाळेच्या १७ वर्षांखालील (U-17) मुलांच्या संघाने उत्कृष्ट कामगिरी करत सुब्रतो मुखर्जी फुटबॉल कप’वर आपले नाव कोरले तर १५ वर्षांखालील (U-15) मुलांच्या संघाला अटीतटीच्या सामन्यात उपविजेतेपदावर समाधान मानावे लागले.
१७ वर्षांखालील मुलांच्या संघाने स्पर्धेच्या सुरुवातीपासूनच मैदानावर आपले वर्चस्व राखले. या संघाचा विजेतेपदाचा प्रवास खालीलप्रमाणे राहिला: पहिली मॅच (प्री-क्वार्टर फायनल) मिशन हायस्कूलने नवबौद्ध संघाचा ५-० अशा मोठ्या फरकाने पराभव केला. दुसरी मॅच (क्वार्टर फायनल) के. आर.पब्लिक स्कूलविरुद्ध खेळताना मिशनच्या संघाने १-० ने विजय मिळवला.
तिसरी मॅच (सेमीफायनल) शहादा चावरा संघाविरुद्धचा सामना अत्यंत चुरशीचा झाला. पेनल्टी स्ट्रोकमध्ये मिशन हायस्कूलने १-० ने बाजी मारत फायनलमध्ये धडक दिली.
चौथी मॅच (फायनल) अंतिम सामन्यात पी. जी. पब्लिक स्कूलचे तगडे आव्हान होते. मात्र, मिशनच्या मुलांनी अप्रतिम खेळाचे प्रदर्शन करत ५-४ अशा गोलफरकाने हा सामना जिंकला आणि सुब्रतो मुखर्जी फुटबॉल कपवर आपले नाव कोरले. या ऐतिहासिक विजयामुळे मिशन हायस्कूलचा १७ वर्षांखालील मुलांचा फुटबॉल संघ आता धुळे येथे होणाऱ्या विभागीय सुब्रोतो मुखर्जी फुटबॉल स्पर्धेसाठी नंदुरबार जिल्ह्याचे प्रतिनिधित्व करणार आहे.
१५ वर्षांखालील मुलांच्या संघानेही स्पर्धेत चांगली झुंज दिली. क्वार्टर फायनलमध्ये त्यांनी ‘खापर येथील इरा इंटरनॅशनल संघाचा ५-० ने धुव्वा उडवला. सेमीफायनलमध्ये ‘के. आर.’ संघाविरुद्धचा सामना पेनल्टी स्ट्रोकपर्यंत गेला, ज्यात मिशनने ३-२ असा विजय मिळवून फायनल गाठली.अंतिम सामन्यात ‘अहिंसा इंटरनॅशनल’ संघाविरुद्ध खेळताना मिशन हायस्कूलला ०-१ अशा निसटत्या पराभवाचा सामना करावा लागला. त्यामुळे या संघाला उपविजेतेपदावर समाधान मानावे लागले. मिशन हायस्कूलच्या या दैदिप्यमान यशामुळे शाळेसह संपूर्ण जिल्ह्यातून खेळाडूंचे अभिनंदन होत आहे. शाळेच्या प्राचार्य नूतनवर्षा वळवी, उपप्राचार्य विजय पवार, पर्यवेक्षक वंदना जांबिलसा आणि पर्यवेक्षक मीनलकुमार वळवी यांनी विजयी खेळाडूंची पाठ थोपटत त्यांच्यावर कौतुकाची थाप टाकून पुढील वाटचालीस शुभेच्छा दिल्या.
या यशस्वी संघाला शाळेचे क्रीडाशिक्षक मिनलकुमार वळवी, सतीश सदाराव, शारदा पाटील आणि खुशाल शर्मा यांचे बहुमूल्य मार्गदर्शन लाभले. खेळाडूंच्या या यशामुळे धुळे येथील आगामी विभागीय स्पर्धेकडे आता सर्वांचे लक्ष लागले आहे.
