नंदुरबार l प्रतिनिधी
राष्ट्रीय मानवाधिकार आयोग, नवी दिल्लीचे सदस्य प्रियांक कानूनगो यांच्या अध्यक्षतेखाली जिल्हा नियोजन समिती सभागृह येथे आज मानवाधिकार आयोग आणि सर्वसमावेशक विकासाशी संबंधित जिल्ह्यातील प्रमुख अधिकाऱ्यांची आढावा बैठक संपन्न झाली.
या बैठकीय जिल्हाधिकारी डॉ. मित्ताली सेठी, जिल्हा पोलीस अधिक्षक अश्विनी सानप, तसेच विविध विभागाचे अंमलबजावणी अधिकारी यावेळी उपस्थित होते.
जिल्हाधिकारी डॉ. मित्ताली सेठी यांनी सुरुवातीस नंदुरबार जिल्ह्याची भौगोलिक, आर्थिक, शैक्षणिक, आरोग्य, रस्ते, जिल्ह्यात सुरु असलेल्या महत्वाच्या कामांची व येणाऱ्या अडीअडचणीबाबत माहिती दिली.
राष्ट्रीय मानवाधिकार आयोगाचे सदस्य प्रियांक कानूनगो यांनी यावेळी, बालकांचे हक्क आणि बाल न्याय व्यवस्था, जिल्हा परिषद शिक्षण विभाग, आदिवासी विकास शिक्षण विभाग, दिव्यांग व्यक्तींचे हक्क, ज्येष्ठ नागरिकांचे हक्क, पंचायती राज संस्था आणि स्थानिक स्वराज्य संस्थांचे कामकाज, आरोग्य, रोजगार आणि कौशल्य विकास, मानवी तस्करी, क्रीडा आणि मानवाधिकार, युवा व्यवहार,सांस्कृतिक, तात्विक आणि कलात्मक अभिव्यक्तींमधील मानवाधिकार, बाल लैंगिक शोषण आदि विषयांचा आढावा घेतला.
मानवाधिकार आयोग आणि सर्वसमावेशक विकासाशी संबंधित विषयात्मक क्षेत्रांबाबत अंमलबजावणी तसेच केंद्र आणि राज्य सरकारच्या कल्याणकारी योजना आणि लागू असलेले संबंधित नवीन कायदे, नियम यांची काटेकारपणे अंमलबजावणी करण्याच्या संबंधित अधिकाऱ्यांना सूचना त्यांनी यावेळी दिल्या.
