खापर l प्रतिनिधी
अक्कलकुवा तालुक्यातील ग्रामपंचायतींच्या सार्वत्रिक निवडणुकीसाठी दि. १६ ऑक्टोबर रोजी मतदान प्रक्रिया होणार असून त्यासाठी निवडणूक यंत्रणा सज्ज झाली आहे.
तहसीलदार तथा निवडणूक अधिकारी सचिन मस्के यांच्या मार्गदर्शनाखाली नायब तहसीलदार दिलीप गांगुर्डे यांच्या नेतृत्वाखाली निवडणूक विभाग व या प्रक्रियेसाठी असलेले कर्मचारी यांनी निवडणुकीसाठी ईव्हीएम सीलबंद केल्या आहेत. ४५ ग्रामपंचायतीपैकी कोयलीविहीर ग्रामपंचायतींच्या सरपंच व सदस्यांची बिनविरोध निवड झाल्याने तेथे निवडणूक होणार नाही. ४४ सरपंच व ४०९ सदस्यांसाठी मतदान प्रक्रिया पार पाडण्यात येणार असून,१५५ मतदान केंद्रांवर मतदान घेतले जाणार आहे.
रविवारी दि.१६ ऑक्टोबर रोजी होणाऱ्या मतदान प्रक्रियेसाठी १५५ गट तयार करण्यात आले आहे, त्यात ७७५ कर्मचारी संख्या असून राखीव म्हणून १५ गट सज्ज आहेत ज्यांची कर्मचारी संख्या ७५ आहे.यासाठी यंत्रणेने कर्मचारी प्रवासासाठी १६ एसटी बसेस व ५५ खाजगी वाहनांचे नियोजन केले आहे.तसेच पोलीस बंदोबस्तासाठी ३२६ कर्मचारी व एस.आर.पी.एफची एक प्लाटून तालुक्याभारत सज्ज झाली आहे. अशी अधिकृत माहिती अक्कलकुवा पोलिस निरीक्षक ए.एस.आगरकर यांनी दिली.
निवडणूक प्रक्रिया सुरू झाल्यापासून अद्ययावत सर्व कामे योग्य रित्या सुरू आहेत.यंत्रणा निवडणूक प्रक्रिया पार पाडण्यासाठी पूर्ण क्षमतेने काम करीत आहे.कायदा व सुव्यवस्थेला गालबोट लागू नये यासाठी तालुक्यातील निवडणूक असलेल्या प्रत्येक गावांत आमचे कर्मचारी व पोलीस दक्षता घेत आहे.
सचिन मस्के,
तहसीलदार अक्कलकुवा
