नंदुरबार | प्रतिनिधी-
धान्य घेवून जाणार्या ट्रकला अडवून पाच लाखाची मागणी करत चालक व क्लिनरला मारहाण झाल्याची घटना नंदुरबार-नवापूर रस्त्यावर घडली. दरम्यान दरोडेखोरांनी चालक व क्लिनचे दोन मोबाईल व १८ हजाराची रोकड लंपास केली आहे. या प्रकरणी दहा जणांविरुद्ध नंदुरबार तालुका पोलीस ठाण्यात गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, आज दि.२२ एप्रिल २०२२. रोजी पावणे नऊ वाजेच्या सुमारास विजय फत्तेचंद अग्रवाल वय ३३ वर्ष धंदा अन्न धान्य खरेदी विक्री रा. खांडबारा ता.नवापुर यांच्य मालकीचे धान्य ट्रक (क्र.टीएस१५-युडी ३९४३) मधून नेण्यात येत होते. नंदुरबार-शिवण रस्त्यावर शिवण नदीजवळ पेट्रोलपंपाजवळ सदर ट्रक विशाल रणछोड गावीत (वय २५ रा. पातोंडा ता.जि.नंदुरबार), मनिष उर्फ बन्टी भगवान महाले (वय २७ रा. आष्टा ता.जि.नंदुरबार), सागर रतिलाल पाडवी, मुन्ना गावीत, जय वळवी, विक्की मोरे, राजा मराठे, नितेश वळवी, भिमा माळी, बबल्या माळी यांनी अडवली. चालक व क्लिनरला पळवून नेवून गाडी सोडविण्यासाठी पाच लाख रुपयांची मागणी केली. तसेच चालक व सहचालकाला मारहाण करुन त्यांच्याजवळील दोन मोबाईल व १८ हजाराची रोकड काढून घेतली. याबाबत विजय अग्रवाल यांनी दिलेल्या फिर्यादीवरुन तालुका पोलीस ठाण्यात दहा जणांविरुद्ध गुन्हा दाखल करण्यात आला आहे. पुढील तपास पोलीस उपनिरीक्षक सुरेश सोनवणे करीत आहेत.
