नंदूरबार l प्रतिनिधी
तळोदा तालुक्यातील मोदलपाडा येथे गेर डिंडन (याहा डिंडन ) नृत्याचे आयोजन करण्यात आले होते.यावेळी ५६० नृत्य कलाकारांनी नऊ चालींवर नृत्य सादर केले.यावेळी हजारो नागरिक उपस्थित होते.
नंदुरबार जिल्ह्यातील अक्कलकुवा आणि तळोदा तालुक्यात प्रामुख्याने होळी सणानिमित्त याहा दिंडन नृत्य करण्याची परंपरा आहे. याची सुरुवात सातपुड्याच्या पायथ्याशी असलेल्या सोजदान येथील कुवरसिंग तापसींग पाडवी यांनी १९५१-५२ मध्ये सुरुवात केली होती. आजपर्यंत ह्या नृत्याची परंपरा सुरू आहे.
नंदुरबार जिल्ह्यातील अक्कलकुवा आणि तळोदा तालुक्यातील सातपुड्याच्या पायथ्याशी असलेल्या गावांमध्ये होळीनिमित्त याहा दिंडन नृत्य सादर करण्याची परंपरा आहे. नृत्यात सहभागी होणाऱ्या कलाकारांना होळीच्या नऊ दिवस पहिले प्रशिक्षण दिलं जातं त्यानंतर होळीच्या दिवशी सुट्टी देऊन पुढील आठ दिवस विविध गावांमध्ये हे नृत्य सादर केले जातं. होळी सणानिमित्त आदिवासी रुढी परंपरेने सुरू असलेल्या या नृत्य कलेला बघण्यासाठी नागरिक उत्सुक असतात. आज तळोदा तालुक्यातील मोदलपाडा या गावांमध्ये या नृत्याचे सादरीकरण करण्यात आले.
या नृत्यात सहभागी होण्यासाठी पाच वर्षाच्या बालकांपासून प्रौढवयीन व्यक्तींना सहभाग घेता येतो. नृत्य सादर करणाऱ्या कलाकारांना ज्या गावात नृत्यू असेल त्याच ठिकाणी मुक्काम करावा लागतो. या काळात नृत्यात सहभागी झालेले व्यक्ती आंघोळ करत नाही. स्त्री सहवास टाळावा लागतो, केवळ स्वतःचे ओठ व डोळे ओले करू शकतात. पायात चप्पल न घालणे, पाणी न ओलांडणे आधी कडक नियम पाळावे लागतात. हे नृत्य सादर करण्यासाठी आज ५६० नृत्य कलाकार सहभागी झाले . यावर्षी 18 मार्च पासून परंपरेनुसार गेर दिंडन नृत्याला सुरुवात झाली असून आज तळोदा तालुक्यातील मोदलपाडा येथे कार्यक्रम सादर करण्यात आला आणखी पुढे दोन दिवस हा कार्यक्रम सुरु राहणार आहे. त्यानंतर याची सांगता करण्यात येणार आहे. सातपुड्याच्या पायथ्याशी असलेल्या गावांमध्ये होळीनिमित्त नृत्य सादर करण्याच्या या परंपरेला एक वेगळे महत्त्व आहे. यावेळी माजी मंत्री ॲड.पद्माकर वळवी.जिल्हा परिषद अध्यक्षा ॲड.सीमाताई वळवी, नंदुरबार जिल्हा परिषदेचे मुख्य कार्यकारी अधिकारी रघुनाथ गावडे, जि. प.उपाध्यक्ष ॲड.राम रघुवंशी, जि. प.रतन पाडवी, सभापती अजित नाईक,जि. प.सदस्य सुहास नाईक, सी.के.पाडवी, मधुकर नाईक,नगरसेवक गौरव वाणी, दीपक दिघे यांच्यासह विविध पक्षांचे पदाधिकारी अधिकारी व कर्मचारी आदी उपस्थित होते. या अनोख्या नृत्याचा आनंद घेण्यासाठी हजारो नागरिक उपस्थित होते.
