नंदुरबार l प्रतिनिधी
तालुक्यातील आखातवाडे शिवारात सुझलॉनच्या विद्युत तारांमध्ये झालेल्या शॉर्ट सर्किटने गुरे बांधण्याच्या शेडला आग लागल्याने आगीत गाईचा होरपळून मृत्यू झाला असून बैल जखमी झाला होता. या सोबतच धान्यासह शेती उपयोगी असे सुमारे ६ लाख ७ हजार रुपयांचे साहित्य खाक झाल्याने काल आ. डॉ. विजयकुमार गावित यांनी घटनास्थळी भेट देवून पाहणी केली तसेच नुकसानग्रस्त शेतकऱ्याला मदत मिळवून देण्यासाठी प्रयत्नशील असल्याचे त्यांनी सांगितले.
नंदुरबार तालुक्यातील मांडळ येथील देविदास गोविंदा माळी यांचे आखातवाडे शिवारात शेत आहे. शेतातच त्यांनी गुरांना बांधण्यासाठी शेड उभारला आहे. दि.१९ मार्च रोजी रात्री १.३० वाजेच्या सुमारास सुझलॉन कंपनीच्या विद्युत तारांमध्ये अचानक शॉर्ट सर्किट झाल्यामुळे गुरांसाठी असलेल्या शेडला आग लागून पूर्ण शेड जळून खाक झाला. यामध्ये गहू, पत्रे, गीरगाय, औतसाहित्य, बोरींग पाईप कॉपर केबल, ताडपत्री, टब, रासायनिक खत, किटकनाशके, पाण्याच्या टाक्या,
दोरखंड, चारा, ठिबक सिंचनचे साहित्य किंमतीचा मुद्देमाल खाक झाला आहे. दरम्यान, एक बैल जखमी झाला आहे. दरम्यान, काल आ. डॉ. विजयकुमार गावित यांनी घटनास्थळी भेट देवून आढावा घेतला. यावेळी नुकसानग्रस्त शेतकऱ्यांना नुकसान भरपाई मिळवून देण्यासाठी प्रयत्न करणार असल्याचे आ. डॉ. गावित यांनी आश्वासन दिले. दरम्यान, घटनास्थळी उपस्थित शेतकऱ्यांनी संबंधित सुझलॉन कंपनीवर कारवाईची मागणी केली आहे. यावेळी अरुण रामराजे, भीमराव अहिरे, दीपक पाटील यांच्यासह स्थानिक रहिवासी उपस्थित होते.
