तळोदा l प्रतिनिधी
भाजपाचे पालिकेतील गटनेते भास्कर मराठे व नगरसेविका सूनयना अनुप उदासी यांना पक्षाने निलंबनाची नोटीस बजावली असून सूनयना उदासी यांनी ही नोटस न स्वीकारल्याने चक्क त्यांच्या दरवाजावरच ही नोटीस चिटकविण्यात आली आहे.या दरम्यान भाजपाचे कार्यकर्ते व नगरसेविका तथा महिला व बालविकास सभापती सूनयना उदासी यांचे पती अनुप उदासी यांनी भाजपाला रामराम ठोकून शिवसेनेत प्रवेश केल्याने राजकीय वातावरण ढवळून निघाले आहे. तसेच भाजपाच्या या नोटिसमुळे तळोदा शहरात खमंग चर्चा रंगली आहे.
तळोदा नगरपालिकेच्या बुधवारी विविध विषय समित्यांची निवड घेण्यात आली होती. या निवडीत भाजपाचे नगराध्यक्ष उपनगराध्यक्षासह तब्बल ९ नगरसेवक गैरहजर होते. त्यामुळे महत्वाची बांधकाम समिती ही विरोधकांच्या ताब्यात गेली. ही बाब पक्षाच्या चांगलीच जिव्हाळी लागली आहे. त्यामुळे पक्षाने गटनेते भास्कर मराठे व नगरसेविका सूनयना अनुप उदासी यांना निलंबनाची नोटीस
बजावली असून ती नोटीस जिल्हाध्यक्ष विजय चौधरी यांनी काढली आहे. या नोटीसीत म्हटले आहे की, तळोदा नगरपालिकेच्या विशेष समितीच्या निवडणुकीसंदर्भात बोलवण्यात आलेल्या बैठकीत आपण गैरहजर राहिलात व विरोधी गटाला मदत होईल अशी कृती केली शिवाय पक्षा विरोधी कारवाई केली असे नमूद करून यापूर्वीही पक्षाच्या कार्यक्रमात आपण गैरहजर राहतात तसेच पक्षाच्या ध्येयधोरणा विरोधात टीका टिप्पणी करत असतात. म्हणून या बाबत आपणास वेळोवेळी तोंडी सूचना देऊन ही आपल्या वर्तवणुकीत बदल झालेला नाही त्यामुळे पक्षविरोधी कृतीच्या अनुषंगाने आपणास पक्षातून निलंबित का करू नये याची खुलासा तीन दिवसात करावा ही नोटीस नगरसेविका सूनयना उदासी यांनी प्रत्यक्ष न स्वीकारल्याने त्यांच्या चक्क घराच्या दरवाजावर चिटकवन्यात आली आहे.
तळोदा येथील भाजपाच्या नगरसेविका सूनयना उदासी यांचे पती अनुप उदासी यांनी भाजपाला सोडचिठ्ठी देऊन शिवसेनेत प्रवेश केला आहे. याबाबत त्यांनी भाजपा सोडण्याचे पक्षांतर्गत असलेला कलह मोठ्या प्रमाणात वाढला असल्याने याला कंटाळून त्यांनी भाजपा सोडून शिवसेनेत प्रवेश केला. अशी माहिती पत्रकार परिषदेत दिली. या दरम्यान पालिकेच्या विषय समित्यांच्या निवडीवरून झालेला भाजपा अंतर्गत झालेला मतभेद हेच पक्ष सोडण्याचे प्रमुख कारण असल्याचे त्यांनी सांगितले. यावेळी जिल्हाउपप्रमुख आनंद सोनार, शहर प्रमुख जितेंद्र दुबे, विनोद वंजारी, संजय पटेल, विपुल कुलकर्णी, विजय मराठे, जगदीश चौधरी, उदासी हे गेल्या चार महिन्यांपासून भाजपाहुन लांब राहून सेनेशी सलगी वाढवली होती.
