नंदूरबार l प्रतिनिधी
आंदोलने किंवा अन्य घटनांमध्ये कायदा व सुव्यस्थेचा प्रश्न निर्माण झाल्यास दंगलसदृश परिस्थितीत अनेकदा पोलिसांवर दगड भिरकावले जातात. अशा घटनांमध्ये पोलिसांना बचाव करता यावा यासाठी नंदुरबार जिल्हा पोलीस दलाला २५० बॉडी प्रोटेक्टर जाकीट देण्यात आले आहेत. पोलीस दलातर्फे बॉडी प्रोटेक्टर जाकीट घालून नंदूरबार शहरात पथसंचलन केले.
बुलेटप्रूफ जाकोटच्या धर्तीवर नवीन जाकीट तयार करण्यात आले असून बॉडी प्रोटेक्टर जाकिटाचे वजन पाच ते सहा किलोदरम्यान आहे. बऱ्याचदा दंगल भडकल्यास पोलिसांवर जमावाकडून दगडफेक तसेच बाटल्या भिरकावल्या जातात. दगडफेकीच्या घटनांमध्ये हे जाकीट पोलीसांच्या संरक्षणासाठी उपयुक्त ठरणार आहे.दरम्यान, काल नंदुरबारात नवीन वर्षाच्या पार्श्वभूमीवर शहरातून रूट मार्च करण्यात आला. यावेळी पोलीस महासंचालकांकडून मिळालेल्या २५० नवीन सुरक्षा बॉडी प्रोटेक्टर जाकीट घालून पोलीस दलातर्फे संचलन करण्यात आले. नवीन वर्षामध्ये नंदुरबार पोलीस सुरक्षा कवचासह नागरिकांच्या सुरक्षेसाठी तत्पर असणार आहेत, असा संदेश यानिमित्ताने देण्यात आला.सदर जाकिटाचे वैशिष्टय म्हणजे वजनाने अतिशय हलकी आहेत. हे जाकीट परिधान केल्यानंतर पोलिसांचे हात, पाय, छाती, पाठ या अवयवांचे संरक्षण होईल. फायबरपासून हे जाकीट तयार करण्यात आले असून, अंतर्गत भागात स्पंजचा वापर करण्यात आला आहे. शिरस्त्राण आणि जाकीट परिधान केल्यास तणावपूर्ण घटनांना सामोरे जाणाऱ्या पोलिसांना दुखापत होणार नाही.
