नंदुरबार l प्रतिनिधी
महिला व बाल विकास विभागाच्या वतीने जिल्हा महिला व बालविकास अधिकारी , नंदुरबार यांच्या कार्यालयामार्फत शुभमंगल सामूहिक विवाह योजना राबविण्यात येत असून योजनेसाठी इच्छुकांनी प्रस्ताव सादर करावे. असे आवाहन जिल्हा महिला व बालविकास अधिकारी साईनाथ वंगारी यांनी केले आहे.
राज्य शासनाच्या विशेष पॅकेजमधून शुभमंगल सामूहिक विवाह योजना खुला प्रवर्ग व इतर मागासवर्गीय प्रवर्गासाठी राबविण्याचा निर्णय शासनाने घेतला आहे. ही योजना जिल्ह्यातील नोंदणीकृत स्वंयसेवी संस्थेमार्फत राबविण्यात येणार असून संस्थेस एका जोडप्यामागे 2 हजार रुपये व प्रत्येक जोडप्यास 10 हजार रुपयांचे अनुदान देण्यात येईल. योजना राबवितांना संस्थेस पाच वधू- वरांचा गट करणे आवश्यक असेल. तसेच या योजनेतंर्गत नोंदणीकृत विवाह करणाऱ्या खुल्या प्रवर्ग व इतर मागासवर्गीय (ओ.बी.सी ) दाम्पत्यांनाही या योजनेद्वारे 10 हजार रुपयांचा लाभ देण्यात येईल.
जिल्ह्यातील ज्या नोंदणीकृत संस्था ही योजना राबविण्यासाठी इच्छुक असतील त्यांनी तसेच नोंदणीकृत विवाह करणाऱ्या खुल्या प्रवर्ग व इतर मागासवर्गीय दांपत्यांनी योजनेच्या अधिक माहितीसाठी व विहीत नमुन्यातील अर्जासाठी जिल्हा महिला व बालविकास अधिकारी कार्यालय, मध्यवर्ती प्रशासकीय इमारत,दुसरा मजला, कक्ष क्रमांक 226, टोकरतलाव रोड, नंदुरबार (02564-210047 ) येथे संपर्क साधावा.
