नंदुरबार l प्रतिनिधी-
विकसित भारत २०४७ या संकल्पनेच्या अनुषंगाने युवकांना भविष्यकालीन आव्हानांसाठी सक्षम, कौशल्यसंपन्न आणि जबाबदार नागरिक म्हणून घडविण्याच्या उद्देशाने ‘विकसित भारत यंग लीडर्स डायलॉग २०२६ – यंग प्रोफेशनल्स राउंडटेबल’ या विशेष कार्यक्रमाचे आयोजन करण्यात आले. युवा कार्यक्रम व क्रीडा मंत्रालय, भारत सरकार यांच्या मार्गदर्शनाखाली माय भारत नंदुरबार आणि झेप फाउंडेशन यांच्या संयुक्त विद्यमाने हा उपक्रम पार पडला.
नंदुरबारमध्ये प्रथमच आयोजित करण्यात आलेल्या या कार्यक्रमातून ग्रामीण व आदिवासी भागातील युवकांना राष्ट्रीय विकासाच्या चर्चेत सहभागी करून घेण्याचा प्रयत्न करण्यात आला. डॉ. रेखा चौधरी यांच्या पुढाकारातून तसेच काकासाहेब महाविद्यालयाच्या सहकार्याने हा उपक्रम साकार झाला.
कार्यक्रमाला माजी आमदार शिरीषदादा चौधरी, डॉ. रेखा चौधरी, जिल्हा युवा अधिकारी भुषण पाटील, नंदुरबार नगरपालिकेचे उपाध्यक्ष प्रथमेश चौधरी, नगरसेवक गौरव चौधरी, सोनिया देशमुख, डॉ. चंद्रकांत वाणी आदी मान्यवर उपस्थित होते. पॅनलिस्ट म्हणून डॉ. रेखा चौधरी, प्रा. युवराज भामरे आणि ॲड. सारांश सोनार यांनी मार्गदर्शन केले.
यावेळी डिजिटल वेलनेस, मानसिक आरोग्य, डिजिटल व्यसनमुक्ती, नेतृत्व विकास, रोजगारक्षम कौशल्ये, कृत्रिम बुद्धिमत्ता, नवउद्योजकता आणि राष्ट्रनिर्माणातील युवकांची भूमिका या विषयांवर सखोल चर्चा करण्यात आली. विकसित भारताचे स्वप्न साकार करण्यासाठी डिजिटलदृष्ट्या सक्षम आणि मानसिकदृष्ट्या संतुलित युवा पिढी घडविणे आवश्यक असल्याचे मत डॉ. रेखा चौधरी यांनी व्यक्त केले.
कार्यक्रमात सुमारे २०० युवक-युवती सहभागी झाले होते. चर्चेदरम्यान युवकांनी कौशल्य विकास, रोजगार, मानसिक स्वास्थ्य, डिजिटल शिस्त, नवकल्पना, उद्योजकता आणि सामाजिक नेतृत्व या विषयांवर महत्त्वपूर्ण सूचना मांडल्या. युवक आणि तज्ज्ञांमधील मुक्त संवादातून अनेक विधायक विचार पुढे आले.
