अवैध दारू वाहतुकीवर स्थानिक गुन्हे शाखेची कारवाई; 29 लाखांचा मुद्देमाल जप्त
नंदुरबार l प्रतिनिधी-
शहादा मार्गे गुजरात राज्यात चोरट्या पद्धतीने नेण्यात येणाऱ्या अवैध विदेशी दारूवर स्थानिक गुन्हे शाखेने धडक कारवाई करत मोठा साठा जप्त केला आहे. या कारवाईत एकूण 28 लाख 87 हजार 360 रुपये किमतीचा मुद्देमाल हस्तगत करण्यात आला असून एका आरोपीस अटक करण्यात आली आहे.
स्थानिक गुन्हे शाखेचे पोलीस निरीक्षक हेमंत पाटील यांना गुप्त बातमीदारामार्फत माहिती मिळाली होती की, एक पांढऱ्या रंगाच्या पिकअप वाहनातून (क्र. MH 14 GD 7497) अवैधरित्या विदेशी दारूची वाहतूक केली जाणार आहे. या माहितीनुसार वरिष्ठांच्या मार्गदर्शनाखाली पथकाने शहादा शहरातील शिरुड चौफुली परिसरात शहादा-प्रकाशा मार्गावर सापळा रचला.
पहाटे सुमारे 5.30 वाजता संशयित वाहन येताना दिसताच पोलिसांनी ते थांबवून चौकशी केली. वाहनचालकाने समाधानकारक उत्तरे न दिल्याने वाहनाची तपासणी करण्यात आली असता त्यात 217 खोक्यांमध्ये भरलेली अवैध विदेशी दारू आढळून आली. या प्रकरणी देवेंद्र खुमाराम मेघवाल (वय 26, रा. पाली, राजस्थान) याला ताब्यात घेण्यात आले.
या घटनेप्रकरणी शहादा पोलीस ठाण्यात महाराष्ट्र दारुबंदी कायदा कलम 65(ई) व 108 अन्वये गुन्हा दाखल करण्यात आला आहे.
ही कारवाई पोलीस अधीक्षक श्रवण दत्त एस व अपर पोलीस अधीक्षक आशित कांबळे यांच्या मार्गदर्शनाखाली पोलीस निरीक्षक हेमंत पाटील, पोउपनि मुकेश पवार, विकास गुंजाळ तसेच पथकातील इतर कर्मचाऱ्यांनी पार पाडली.
