नंदुरबार l प्रतिनिधी-
माजी मंत्री तथा आमदार डॉ. विजयकुमार गावित यांच्या प्रकृतीत सुधारणा व्हावी, यासाठी जिल्हा परिषद सदस्य शांताराम पाटील यांनी नाशिंदा येथील पावबा ऋषी यांच्याकडे नवस केला होता. डॉ. गावित यांच्या प्रकृतीत सुधारणा झाल्यानंतर या नवसपूर्तीसाठी बुधवारी (४ नोव्हेंबर) नंदुरबार ते नाशिंदा अशी सुमारे २२ किलोमीटरची पदयात्रा काढण्यात आली.
नंदुरबार येथून सुरू झालेली ही पदयात्रा उमर्दे खुर्द, वडवद, भालेर आणि काकरदे मार्गे नाशिंदा येथे पोहोचणार आहे. तेथे पावबा ऋषीच्या मंदिरात धार्मिक विधी करून नवसपूर्ती केली जाणार आहे.
या पदयात्रेचे स्वागत भालेर येथे काकेश्वर विद्या प्रसारक संस्थेचे संस्थापक अध्यक्ष भास्कर पाटील यांनी केले.
या पदयात्रेत माजी जिल्हा परिषद अध्यक्ष डॉ. सुप्रिया गावित, मा.जिल्हा परिषद सदस्य शांताराम पाटील, भाजपचे नंदुरबार तालुकाध्यक्ष दीपक पाटील, नंदुरबार पालिकेचे विरोधी पक्षनेते हिरालाल चौधरी, माजी जिल्हा परिषद सदस्य शोभा पाटील, होळ तर्फे रनाळेचे सरपंच व्यंकटेश पाटील, बलवंडचे सरपंच संजय पाटील, भालेरचे चंद्रशेखर पाटील, भिका पाटील, रमेश पाटील, वैदाणेचे माजी सरपंच डॉ. मनोज पाटील, कंढरे येथील लोटन पाटील, सुपडू पाटील, मुन्ना पाटील, प्रकाश भोई यांच्यासह कार्यकर्ते आणि ग्रामस्थ सहभागी झाले होते.
पदयात्रेतील सहभागी भाविकांसाठी भालेर येथील राम मंदिर परिसरात नाश्त्याचे आयोजन करण्यात आले होते. नाश्ता आटोपल्यानंतर पदयात्रा पुढील प्रवासासाठी नाशिंदा
कडे रवाना झाली. डॉ. गावित यांच्या प्रकृतीत सुधारणा झाल्याबद्दल कृतज्ञता व्यक्त करण्यासाठी आणि केलेला नवस पूर्ण करण्यासाठी ही दिंडी काढण्यात आली आहे.
