नंदुरबार l प्रतिनिधी-
नंदुरबार तालुक्यातील भालेर येथील का. वि. प्र . सं. संचलित श्रीमती क. पु. पाटील माध्यमिक व कनिष्ठ महाविद्यालयात संत गाडगे महाराज यांची जयंती मोठ्या उत्साहात आणि सामाजिक बांधिलकी जपत साजरी करण्यात आली.
यंदाच्या जयंतीनिमित्त विद्यार्थ्यांनी आणि शिक्षकांनी गाव व शाळा परिसराची स्वच्छता करून संतांच्या कार्याला प्रत्यक्ष कृतीतून अभिवादन केले.
कार्यक्रमाच्या अध्यक्षस्थानी प्राचार्य पी. एस. सूर्यवंशी होते. प्रमुख पाहुणे म्हणून पर्यवेक्षक पी. डी. पाटील सर यांच्यासह ए. व्ही. कुवर, ए. एस. पटेल, व्ही. व्ही. ईशी, वैभव नाईक, पी. बी. पाटील, मयूर पाटील, सौ. सी. व्ही. पाटील, श्रीमती मोनिका पाटील, अश्विनी पाटील, दिपाली धनगर आदी मान्यवर उपस्थित होते.
कार्यक्रमाची सुरुवात संत गाडगे महाराज यांच्या प्रतिमेचे पूजन करून करण्यात आले. यावेळी इयत्ता आठवीतील विद्यार्थी चैतन्य ज्ञानेश्वर पाटील याने साकारलेली संत गाडगे महाराजांची वेशभूषा सर्वांचे लक्ष वेधून घेणारी ठरली. त्याच्या प्रभावी सादरीकरणातून स्वच्छता, स्वावलंबन, समाजसेवा आणि अंधश्रद्धा निर्मूलन या संतांच्या विचारांचा जिवंत संदेश उपस्थितांपर्यंत पोहोचला.
कार्यक्रमात सामाजिक जाणीव, स्वच्छतेचे महत्त्व आणि संस्कारमूल्यांचा संदेश देण्यात आला.
आपल्या अध्यक्षीय मनोगतात
प्राचार्य श्री. सुर्यवंशी यांनी संत गाडगे महाराजांच्या जीवनकार्याचा उल्लेख करत विद्यार्थ्यांना प्रेरणादायी संदेश दिला. ते म्हणाले,
“संत गाडगे बाबा यांनी दिलेला ‘स्वच्छ गाव – सुंदर गाव’ तसेच ‘स्वच्छ शाळा – सुंदर शाळा’ हा संदेश आपण आपल्या दैनंदिन जीवनात आचरणात आणला पाहिजे. शिक्षणाबरोबरच चांगले संस्कार आणि समाजसेवेची भावना जोपासणे हीच खरी संतांची शिकवण आहे.
यानंतर सर्व विद्यार्थ्यांनी शिक्षकांसमवेत शाळा व गाव परिसर स्वच्छ करून स्वच्छतेचा संदेश कृतीतून दिला. या उपक्रमामुळे संपूर्ण गावात उत्साहाचे वातावरण निर्माण झाले.
कार्यक्रमाचे प्रास्ताविक व सूत्रसंचालन सौ. सी. व्ही. पाटील यांनी केले. कार्यक्रमाच्या यशस्वी आयोजनासाठी विद्यालयातील प्राध्यापक, शिक्षक-शिक्षिका व शिक्षकेतर कर्मचारी यांनी विशेष परिश्रम घेतले.
संत गाडगे महाराज जयंतीनिमित्त राबविण्यात आलेल्या या स्वच्छता अभियानामुळे विद्यार्थ्यांमध्ये सामाजिक जबाबदारीची भावना दृढ झाली असून गावकऱ्यांनीही या उपक्रमाचे कौतुक केले.
