नंदुरबार l प्रतिनिधी
येथे हस्ती-जिभाऊ करंडक राज्यस्तरीय एकांकिका स्पर्धा ही दि.१० ते ११ फेब्रुवारी २०२४ दरम्यान संपन्न होणार असून या स्पर्धेतील विजेत्यांना दिल्या जाणार्‍या पारितोषिकांची रचना आयोजन समितीतर्फे जाहीर करण्यात आली.
नंदुरबार येथील छत्रपती शिवाजी महाराज नाट्यगृहात गाडगेबाबा शैक्षणिक व सांस्कृतिक सेवा मंडळ शिंदे, ता.जि.नंदुरबारतर्फे आयोजित दि हस्ती को-ऑप बँक लिमिटेड प्रायोजित राज्य पुरस्कृत शिक्षक जयदेव लिंबा पेंढारकर तथा जिभाऊ यांच्या स्मरणार्थ हस्ती-जिभाऊ करंडक राज्यस्तरीय एकांकिका स्पर्धा दि.१० व ११ फेब्रुवारी २०२४ दरम्यान होणार आहे.
या स्पर्धेचे यंदाचे १३ वे वर्ष आहे. स्पर्धेत प्रथमच विनोदी एकांकिकासाठी सांघिक पारितोषिक देण्यात येणार आहे, असे आयोजकांनी जाहीर केले. तसेच उर्वरित पारितोषिक रचना पुढील प्रमाणे जाहीर करण्यात आली. त्यात प्रथम येणार्‍या एकांकिकेस जिभाऊ करंडक सह ११ हजार रुपयाचा धनादेश व प्रशस्तीपत्र मिळतील. तसेच द्वितीय व तृतीय एकांकिकेस अनुक्रमे करंडकासह ७ हजार रुपये व ५ हजार रुपयांचा धनादेश व प्रशस्तीपत्रके मिळतील. उत्कृष्ट प्रायोगिक एकांकिका, लक्षवेधी एकांकिका व विनोदी एकांकिकेसाठी प्रत्येकी २ हजार रुपये, करंडक व प्रशस्तीपत्रके मिळतील.
सर्वोत्कृष्ट अभिनय पुरुष व स्त्री तसेच सर्वोत्कृष्ट दिग्दर्शन प्रथम साठी रोखे २ हजार रुपये, द्वितीय साठी रोखे १ हजार रुपये व तृतीय साठी रोखे पाचशे रुपये सह स्मृतिचिन्ह व प्रशस्तीपत्रक देण्यात येतील. त्याचप्रमाणे सर्वोत्कृष्ट संगीत, लेखन, नेपथ्य, प्रकाश योजना यासाठी ही प्रत्येकी रोखे २ हजार रुपये, स्मृतिचिन्ह व प्रशस्तीपत्रके देण्यात येतील. तसेच सहभागी संघांना देखील सहभागाची प्रशस्तीपत्रके देण्यात येतील असे आयोजकांतर्फे जाहीर करण्यात आले आहे.
या राज्यस्तरीय एकांकिका स्पर्धेत राज्यातील जास्तीत जास्त नाट्य संस्थांनी व महाविद्यालयांनी सहभागी होऊन नंदुरबार जिल्ह्यातील नाट्य चळवळीला चालना द्यावी असे आवाहन आयोजक नागसेन पेंढारकर, मनोज सोनार, राजेश जाधव, आशिष खैरनार यांच्यासह क्षमा वासे-वसईकर, कुणाल वसईकर, सागर कदम, काशिनाथ सूर्यवंशी, जितेंद्र खवळे, तुषार ठाकरे, राहुल खेडकर, पुरुषोत्तम विसपुते, हर्षल महिरे, तुषार सांगोरे, रत्नदीप पवार, प्रफुल्ल महिरे आदींनी केले आहे.
