नंदुरबार l प्रतिनिधी
राज्यातील ग्रामीण भागातील सुशिक्षीत बेरोजगारांना राष्ट्रीय गोकुळ मिशन अंतर्गत मैत्री म्हणून प्रशिक्षण देवून प्रशिक्षित व्यक्तीची कृत्रिम रेतन व अनुषंगीक कार्य करण्यासाठी नियुक्ती करण्यात येणार असल्याची माहिती जिल्हा पशुसंवर्धन उपआयुक्त डॉ. उ. दे. पाटील यांनी एका शासकीय प्रसिद्धी पत्रकान्वये दिली आहे.
या प्रशिक्षणातून राज्यातील गायी-म्हशीमध्ये कृत्रिम रेतनाची व्याप्ती वाढेल व ग्रामीण भागातील सुशिक्षीत बेरोजगारांना रोजगार उपलब्ध होईल. तसेच दुग्धउत्पादनात वाढ होवून शेतकऱ्यांचे उत्पन्न दुप्पट होण्यास मदत होईल.
प्रशिक्षण कार्यक्रम 3 महिने कालावधीचा असून यामध्ये 1 महिना क्लासरूम ट्रेनिग व 2 महिने प्रॅक्टीकल ट्रेनिंग चा समावेश राहील. क्लासरूम ट्रेनिंग पशुवेद्यकीय महाविद्यालयामध्ये आयोजित करण्यात येईल व प्रॅक्टीकल ट्रेनिंग जिल्ह्यातील पशुवैद्यकीय दवाखाना श्रेणी-1 किंवा तालुका लघु पशुवैद्यकीय सर्व चिकित्सालय किंवा जिल्हा पशुवैद्यकीय सर्व चिकीत्सालय या ठिकाणी घेण्यात येईल.
हे प्रशिक्षण घेण्यासाठी इच्छूक उमेदवारांकडून अर्ज मागविण्यात येत आहेत. अर्जदार हा किमान 12 वी उत्तीर्ण असावा, त्याचे वय 18 ते 35 वर्षे असावे, अर्जाचा नमुना पशुधन विकास अधिकारी (विस्तार), पंचायत समिती यांच्या कार्यालयात कार्यालयीन वेळेमध्ये उपलब्ध आहेत. नंदुरबार जिल्ह्यासाठी 117 उमेदवारांची प्रशिक्षणासाठी निवड करण्यात येणार आहे.
यासाठी इच्छूक उमेदवारांनी नजिकच्या पशुवैद्यकीय दवाखान्यामार्फत पशुधन विकास अधिकारी (विस्तार), पंचायत समिती यांचेकडे अर्ज सादर करावे असे आवाहनही जिल्हा पशुसंवर्धन उपायुक्त श्री. पाटील यांनी शासकीय प्रसिद्धी पत्रकान्वये केले आहे.
