नंदुरबार l प्रतिनिधी
धुळे येथे आरक्षणासंदर्भात मराठा योद्धा मनोज जरांगे पाटील यांची आज 3 डिसेंबर रविवार रोजी जाहीर सभा आयोजित करण्यात आली आहे.यासाठी हजारोंच्या संख्येने जिल्ह्यातील समाज बांधव जाणार असल्याची माहिती सकल मराठा समाज व मराठा क्रांती मोर्चाच्या वतीने देण्यात आली आहे तसेच अधिकाधिक समाज बांधवांनी उपस्थिती लावावी , असेही आवाहन करण्यात आले आहे .
आरक्षणाच्या लढ्यासाठी मनोज जरांगे पाटील सध्या समाज एकत्रीकरणासाठी संपुर्ण महाराष्ट्रभर दौरे करीत आहेत. धुळे येथे फाशीपूल जेल रोड परिसरातील भगतसिंग चौकात दु.१२ वाजेला सभा होणार आहे. नंदुरबार तालुक्यातील उमर्दे येथील उपोषणकर्ते गुलाब महारु मराठे व सकल मराठा समाज बांधवांनी जिल्ह्यातील तळोदा, शहादा नवापूर, अक्कलकुवा नंदुरबार या तालुक्यातील गावोगावी जावुन समाज बांधवांच्या भेटी घेऊन धुळे येथे होणाऱ्या सभेसाठी उपस्थित राहावे यासाठी आवाहन केले आहे,
धुळे येथील सभेसाठी नंदुरबार जिल्ह्यातील जे समाज बांधव येणार असून त्यांनी दोंडाईचा येथील छत्रपती शिवाजी महाराज यांच्या स्मारकाजवळ सकाळी ९ वाजेला एकत्र येवुन सर्व समाज बांधवांचा पुढील प्रवास सोबत होईल, असे आवाहन सकल मराठा समाज व मराठा क्रांती मोर्चातर्फे करण्यात आले आहे. नंदुरबार जिल्ह्यातील हजारो व्यक्ती या सभेला जाणार असल्याची माहिती सकल मराठा समाजाच्या वतीने देण्यात आली आहे.
