नंदुरबार । प्रतिनिधी
तालुक्यातील रजाळे शेतकरी छगन मराठे यांच्या शेतातील गुरांच्या गोठ्यात पाच फुटी कोब्रा नाग आढळून आल्याने एकच धावपळ उडाली.
याबाबत अधिक माहिती अशी की, शेतकरी शरद छगन मराठे हे नेहमीप्रमाणे शेतात काम करीत असतांना गुरांना चारा टाकण्यासाठी गेले असता त्यांच्या गुरांच्या गोठ्यात साठवून ठेवलेल्या चार्यात लपून बसलेल्या सापाचा अचानक पुस्कारा आल्याने त्यांनी हातात घेतलेला चारा खाली फेकत जीव वाचवून बाजूला झाले.
यावेळी त्यांनी मित्रांच्या मदतीने सर्पमित्र यांच्याशी संपर्क साधून सापाविषयी माहिती दिली. दरम्यान नंदुरबार येथील सर्पमित्र प्रतिक कदम, तेजस मालचे, कुणाल भावसार, सागर साठे यांनी येवुन सापाचा शोध घेतला असता तो कोब्रा जातीचा नाग असल्याचे सांगितले.
हा इंडियन कोब्रा जातीचा नाग पाहिल्यावर भल्या-भल्यांची थरथराट होते. त्याला सर्प मित्रांनी व्यवस्थित पकडून निसर्गाच्या अधिवासात सोडले. यावेळी गावातील बघ्यांची गर्दी झाली होती. दरम्यान, गेल्या आठवड्यापासून गावासह शिवारात अनेक मोठमोठे विषारी, बिनविषारी सर्प निघत आहेत. त्यांना पकडून हे सर्पमित्र जंगलामध्ये सोडून देत आहेत व त्यांचे प्राण वाचविता आहेत.
त्यांच्या या धाडसाबद्दल नागरिकांमध्ये कौतुक होत आहे. तसेच सर्पमित्र प्रतिक कदम, सागर साठे, कुणाल भावसार यांनी यावेळी प्रसार माध्यमाशी बोलतांना सांगितले की, साप दिसला की कोणीही मारू नये, आढळल्यास त्वरीत संपर्क साधावा तसेच साप पकडण्याचे प्रशिक्षण असल्यास तरच साप पकडण्याचे धाडस करावे, अपूर्ण प्रशिक्षण असल्यास जीवावरही बेतू शकते असे आवाहन त्यांनी केले आहे.