नंदूरबार l प्रतिनिधी
धडगाव तालुक्यात अंगणवाडी पोषण आहार घेऊन जाणाऱ्या ट्रकचा पलाहझाडी जवळ भीषण अपघात झाला असून यात तीन जण जखमी झाल्याची प्राथमिक माहिती प्राप्त झाली आहे.
शहादाहुन धडगाव तालुक्यात अंगणवाडी पोषण आहार घेऊन जाणाऱ्या ट्रकचा धडगाव तालुक्यातील पलाहझाडी जवळ अपघात झाला आहे. वाहनाचा ब्रेक फेल झाल्याने चालकाचा वाहनावरील ताबा सुटल्याने पावसाच्या हलक्या सरींमुळे रस्त्यावरून घसरल्याने पोषण आहाराने भरलेला ट्रक पलटी झाला आहे.
ट्रक मध्ये सहा जण होते त्यापैकी तीन जण जखमी झाले असून जखमींपैकी एक जण ट्रकच्या केबिनमध्ये अडकल्याने त्याला वाचवण्यासाठी प्रयत्न केले जात आहे.
अपघात होताच जवळपासच्या स्थानिक नागरिकांनी घटनास्थळी धाव घेत जखमींना बाहेर काढून रुग्णालयात पाठवण्यासाठी मदत केली. सदर अपघाताबाबत धडगाव पोलीस घटनास्थळी दाखल झाले असून अधिक तपास करत आहे.
धडगाव तालुक्यात हलक्या ते मध्यम स्वरूपाचा पाऊस सुरू असल्याने सदर ट्रक मधील पोषण आहार भिजल्याची प्राथमिक माहिती प्राप्त झाली आहे.