नंदुरबार l प्रतिनिधी
शहादा शहरातील टिळक चौकात असलेल्या सोन्याचे दागिने बनविण्याच्या कारखान्यात दागिने बनविण्यासाठी दिलेली सोन्याची लगड चोरी करुन व्यापाऱ्याची सुमारे साडेनऊ लाखात फसवणूक केल्याप्रकरणी कारखान्यातील तिघांविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, शहादा येथील संजय रमेशचंद्र सोनार यांचे टिळक चौकात सोने बनविण्याचा कारखाना आहे. संजय सोनार यांनी कारखान्यातील कामाला असलेल्या सबुर अन्सार मलीक, प्रसंथा साहू गोपाल साहू व सौरव जाना यांना दागिने बनविण्यासाठी सोन्याची लगड दिली होती.
मात्र तिघांनी संगनमत करुन ९ लाख २७ हजार ६६५ रुपये किमतीची १८५.५२२ ग्रॅम सोन्याची लगड चोरी करुन पळून गेले.
याबाबत संजय सोनार यांनी शहादा पोलिस ठाण्यात दिलेल्या फिर्यादीवरुन तिघांविरोधात भादंवि कलम ४२०, ४०६, ३८१, ३४ प्रमाणे गुन्हा दाखल करण्यात आला आहे. पुढील तपास सहाय्यक पोलिस निरीक्षक गणेश पवार करीत आहेत.
