नंदुरबार l प्रतिनिधी
तळोदा तालुक्यातील खर्डी ते बंधारा गावादरम्यान वाहनाने दुचाकीला धडक दिल्याने एक महिला ठार तर दुचाकी चालक महिला जखमी झाल्याची घटना घडली. याप्रकरणी वाहन चालकाविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, तळोदा तालुक्यातील पाडळपूर येथील आशा वर्कर मेघा राजू ठाकरे या दुचाकीवर (क्र.एम.एच.३९ एएच ९७४७) सुमित्रा सुरज वसावे रा.उदयपूर छोटे ता.अक्कलकुवा यांना बसवून जात होत्या.
यावेळी एका चारचाकी वाहन चालकाने त्याच्या ताब्यातील वाहन (क्र.एम.एच.३९ सी ९७९३) रस्त्याच्या परिस्थितीकडे दुर्लक्ष करुन खर्डी ते बंधारा गावादरम्यानच्या रस्त्यावर दुचाकीला धडक दिल्याने अपघात घडला.
घडलेल्या अपघातात सुमित्रा वसावे या ठार झाल्या तर मेघा ठाकरे यांनाही दुखापत झाली. तसेच दुचाकीचेही नुकसान झाले. याबाबत मेघा ठाकरे यांच्या फिर्यादीवरुन
तळोदा पोलिस ठाण्यात चारचाकी वाहन चालकाविरोधात भादंवि कलम ३०४ (अ), ३३७, ३३८, २७९, ४२७ सह मोटार वाहन कायदा कलम १८४/१३४, १७७ प्रमाणे गुन्हा दाखल करण्यात आला आहे. पुढील तपास पोहेकॉ.गौतम बोराळे करीत आहेत.
