नंदुरबार l प्रतिनिधी
शहादा तालुक्यातील परिवर्धा येथून एक व धडगाव तालुक्यातील मांडवी बु.बंधारपाडा येथून एक व नवापूर तालुक्यातील शेगवे येथून एक अशा तीन अल्पवयीन मुलींचे अपहरण केल्याप्रकरणी पोलीसांत गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, शहादा तालुक्यातील परिवर्धा येथून एका १५ वर्षीय मुलीला अज्ञाताने फूस लावून पळवून नेले.
याबाबत मुलीच्या आईने शहादा पोलिस ठाण्यात दिलेल्या फिर्यादीवरुन संशयित दीपक कृष्णा ठाकरे रा.भुते आकसपूर ता.शहादा याच्याविरोधात ३६३ प्रमाणे गुन्हा दाखल करण्यात आला आहे. पुढील तपास पोहेकॉ.मेहरसिंग वळवी करीत आहेत.
तसेच धडगाव तालुक्यातील मांडवी बु.बंधारपाडा येथून एका १६ वर्षीय मुलीला अज्ञात इसमाने फूस लावून पळवून नेले. याबाबत मुलीच्या वडीलांनी धडगाव पोलिस ठाण्यात दिलेल्या फिर्यादीवरुन संशयित संजू मानता पाडवी रा.भूजगाव ता.धडगाव याच्याविरोधात भादंवि कलम ३६३ प्रमाणे गुन्हा दाखल करण्यात आला आहे. पुढील तपास पोहेकॉ.संजय मनोरे करीत आहेत.
तर तिसऱ्या घटनेत नवापूर तालुक्यातील शेगवे येथून एका १४ वर्षीय मुलीस अज्ञाताने फूस लावून पळवून नेले. याप्रकरणी विसरवाडी पोलिस ठाण्यात अज्ञाताविरोधात भादंवि कलम ३६३ प्रमाणे गुन्हा दाखल करण्यात आला आहे. पुढील तपास सहाय्यक पोलिस निरीक्षक भूषण बैसाणे करीत आहेत.