नंदुरबार| प्रतिनिधी
नंदुरबार येथील सेवानिवृत्त ग्रंथपाल हे ठाणेपाडा येथून नंदुरबारकडे येत असतांना रस्त्यावर बेशुध्द झाले. या दरम्यान त्यांची दिड लाखाचे सोन्याचे ब्रेसलेट अज्ञात चोरटयांनी लंपास केल्याची घटना घडली आहे.
याबाबत पोलीस सुत्रांनी दिलेल्या माहितीनुसार, नंदुरबार शहरातील सेवानिवृत्त ग्रंथपाल महादू भिमाजी गवळी हे त्यांच्या मोटरसायकलीवर तालुक्यातील ठाणेपाडा येथे भंडार्याचा कार्यक्रमासाठी गेले होते. भंडार्याचा कार्यक्रमानंतर ते नंदुरबारकडे परत येत असतांना अंबिका माता मंदिराच्या पुढे जनावरांसाठी पाण्याची व्यवस्था केलेल्या हौदाजवळ त्यांना उन्हामुळे चक्कर आल्याने त्यांची मोटरसायकलीवर तोल गेला. त्यामुळे ते रस्त्याच्या बाजूला बेशुध्द झाले. दरम्यान त्यांच्या उजव्या हातातील सहा तोळे वजनाची दिड लाखाची सोन्याची साकळी अज्ञात चोरटयांनी लंपास केल्याची घटना घडली आहे. याप्रकरणी महादू भिमाजी गवळी रा.देसाईपुरा पेट्रोलपंपासमोर (नंदुरबार) यांच्या फिर्यादीवरून तालुका पोलीस ठाण्यात भादंवि कलम ३७९ प्रमाणे गुन्हा दाखल करण्यात आला आहे. याप्रकरणी पुढील तपास पोलीस हे.कॉ. सुरेश वसावे करीत आहेत.