नंदूरबार l प्रतिनिधी
नंदूरबार येथील तहसील कार्यालयात आज आयोजित कार्यक्रमात राष्ट्रीय कुटुंब अर्थसहाय्य योजनेअंतर्गत 65 लाभार्थ्यांना प्रत्येकी 20 हजार रुपयांचा धनादेश व 26 व्यक्तींना नवीन शिधापत्रिकेचे वितरण खा. डॉ. हीना गावीत आ.डॉ.विजयकुमार गावित यांच्या हस्ते करण्यात आले.
नंदूरबार येथील तहसील कार्यालयात आज दि.12 एप्रिल रोजी राष्ट्रीय कुटुंब अर्थसहाय्य योजनेअंतर्गत धनादेश व नवीन शिधापत्रिकेचे वितरण करण्यासाठी कार्यक्रमाचे आयोजन करण्यात आले होते. यावेळी प्रमुख पाहुणे म्हणून खा. हीना गावित, आ.डॉ.विजयकुमार गावित, संजय गांधी योजना तालुका स्तरीय समिती सदस्य श्रीमती रंजनाबाई नाईक, इक्बाल खाटीक, भास्कर पाटील व रविंद्र पठाडे उपस्थित होते.
यावेळी
खा. डॉ. हीना गावीत आ.डॉ.विजयकुमार गावित व मान्यवरांच्या हस्ते एकूण 65 लाभार्थ्यांना प्रत्येकी 20 हजार रुपयांचा धनादेश राष्ट्रीय कुटुंब अर्थसहाय्य योजनेअंतर्गत वितरित करण्यात आले.
दारिद्र रेषेखालील कुटुंबातील वय वर्षे 18 ते 60 वयोगटातील कर्ता व्यक्ती गमावल्यानंतर त्याचे वारसांना सदर अनुदान वितरित करण्यात येते.
तसेच यावेळी तालुक्यातील घुलि या गावातील 26 व्यक्तींना नवीन शिधापत्रिका वितरित करण्यात आल्या. यावेळी तहसीलदार भाऊसाहेब थोरात यांनी प्रास्ताविक मध्ये मार्च 22 मध्ये शासनाकडून निधी प्राप्त झाल्यामुळे इतक्या मोठ्या प्रमाणात लाभार्थ्यांना धनादेश वितरण करणे शक्य झाल्याचे नमूद करून सर्व लाभार्थी यांनी इंदिरा गांधी राष्ट्रीय विधवा निवृत्ती वेतन योजनेसाठी अर्ज करण्याचे आवाहन केले.
यावेळी आ. डॉ.विजयकुमार गावित यांनी जास्तीत जास्त लाभार्थ्यांनी घरकुल योजनेचा देखील लाभ घ्यावा असे आवाहन केले.कार्यक्रमाचे अध्यक्ष खा.डॉ. हीना गावित यांनी सर्व पात्र लाभार्थी यांनी उज्वला गॅस योजनेअंतर्गत अर्ज करावा असे देखील आवाहन केले.
कार्यक्रमाचे सूत्रसंचालन नायब तहसीलदार नितीन पाटील यांनी केले तर आभार नायब तहसीलदार रमेश वळवी यांनी केले.