नंदूरबार । प्रतिनिधी
धुळे – नंदुरबार जिल्हा मध्यवर्ती सहकारी बँकेच्या अध्यक्ष व उपाध्यक्ष पदासाठी दि. 1 डिसेंबर रोजी निवड होणार असून जिल्हा उपनिबंधकांनी निवडणूक कार्यक्रम जाहीर केला आहे. दरम्यान माजी आ. राजवर्धन कदमबांडे यांची अध्यक्ष पदासाठी निवड निश्चित मानली जात आहे. बँकेचे उपाध्यक्षपद नंदुरबार जिल्ह्यास दिले जाण्याची शक्यता आहे. या पदावर कोणाची वर्णी लागते याकडे लक्ष लागले आहे.
धुळे – नंदुरबार जिल्हा मध्यवर्ती सहकारी बँकेच्या 17 जागांसाठी नुकतीच निवडणूक झाली. त्यात विविध मतदार संघातून माजी आ. राजवर्धन कदमबांडे, दीपक पाटील, दर्यावगीर महंत, हर्षवर्धन दहिते, राजेंद्र देसले, अमरसिंग गावीत, शिला पाटील, सीमा रंधे, भरत माळी, प्रभाकर चव्हाण, आ. शिरीषकुमार नाईक, माजी आ. प्रा. शरद पाटील, शामकांत सनेर, भगवान पाटील, माजी आ. चंद्रकांत रघुवंशी, आमशा पाडवी, संदीप वळवी हे नवनिर्वाचित सदस्य आहेत. जिल्हा मध्यवर्ती सहकारी बँकेच्या अध्यक्ष व उपाध्यक्ष पदासाठी दि. 1 डिसेंबर रोजी निवड होणार असून जिल्हा उपनिबंधकांनी निवडणूक कार्यक्रम जाहीर केला आहे. आता अध्यक्ष व उपाध्यक्ष निवडीसाठी 1 डिसेंबरला विशेष बैठक बोलविण्यात आली आहे. त्या दिवशी उमेदवारी अर्ज सकाळी 11 ते 11.15 वाजेपर्यंत भरता येईल. उमेदवारी अर्जांची छाननी सकाळी 11.15 ते 11.25 वाजेदरम्यान होईल. वैध अर्जांचे प्रकाशन सकाळी 11.30 वाजता होईल. माघारीसाठी सकाळी 11.35 ते 11.40 असा वेळ असेल. सकाळी 11.50 वाजता उमेदवारी अर्ज प्रसिध्द करण्यात येईल. दोन्ही पदासाठी एकापेक्षा अधिक उमेदवारांनी नामनिर्देशन पत्र भरल्यास दुपारी 12 ते 12.30 वाजेदरम्यान मतदान घेण्यात येईल. त्यानंतर लगेच जिल्हा उपनिबंधक कार्यालयात मतमोजणी करुन निकाल जाहीर करण्यात येईल. दरम्यान अध्यक्ष व उपाध्यक्ष निवडीसाठी हालचाली सुरु झाल्या आहेत. माजी आ. राजवर्धन कदमबांडे यांची अध्यक्ष पदासाठी निवड निश्चित मानली जात आहे. बँकेचे उपाध्यक्षपद नंदुरबार जिल्ह्यास दिले जाण्याची शक्यता आहे. या पदावर कोणाची वर्णी लागते याकडे लक्ष लागले आहे.
