शैक्षणिक संस्थाचालकांना येणार्या विविध अडीअडचणी, समस्यांबाबत चर्चा करण्यासाठी तालुक्यातील झराळी येथील बीकेफार्म हाऊसवर जिल्हयातील निवडक संस्थाचालकांची बैठक आयोजित करण्यात आली होती. यावेळी विविध विषयांवर चर्चा करण्यात आली.
शैक्षणिक गुणवत्तेत राज्यात नंदुरबार जिल्ह्याचा सर्वात नीच्चांक आहे. अशा परिस्थितीत जिल्ह्याच्या शैक्षणिक गुणवत्तेत वाढ करणे, शालेय व्यवस्थापनावर विविध समस्या व उपाययोजना करणे, संस्थाचालकांना येणार्या अडचणींसंदर्भात समन्वय असणे, शालेय कामकाजात सुधारणा घडवून आणणे संस्थाचालकांचे सेमिनार घेणे, विविध शासन निर्णय कायदे व न्याय निर्णयाचा अभ्यास संस्थाचालकांना करून देणे, अधिकारी व मंत्रालय स्तरावरील कामकाजासाठी कार्यक्षम संस्थाचालकांचा गट तयार करणे आदी विषयांवर चर्चा करण्यासाठी माजी आमदार चंद्रकांत रघुवंशी यांच्या अध्यक्षतेखाली बीके फार्म हाऊसवर निवडक संस्थाचालकांची बैठक आयोजित करण्यात आली होती.
या बैठकीत संस्थाचालकांचे सक्षम व ज्यांना संस्थाच्या समस्यांसंदर्भात ज्ञान आहे अशा होतकरू व्यक्तींचा संस्थाचालक संघटनेत समावेश करावा असेही ठरवण्यात आले. याबाबतीत जिल्हा स्तरावर होणार्या बैठकीस जास्तीत जास्त संस्थाचालकांनी सहभाग घ्यावा याबाबत श्री.रघुवंशी यांनी आवाहन केले. बैठकीला माजी जि.प.सभापती अभिजीत पाटील, सुहास नटावदकर, राजेंद्र गावित, निखिल तुरखीया, नागेश पाडवी, विजय गावित, शेखर पाटील, विवेक पाटील, सौ.प्राप्ती पाटील, राजेश पटेल, युवराज पाटील, जितेंद्र पाटील आदी संस्थाचालक उपस्थित होते. तसेच या बैठकीला काही कारणामुळे उपस्थित राहू न शकलेल्या आ.शिरीष नाईक, डॉ.नरेंद्र पाडवी, मकरंद पाटील, भरत गावित यांनी रघुवंशी यांना दूरध्वनीवर संपर्क साधला व बैठकीचे वृत्त जाणून घेतले. कार्यक्रमाचे नियोजन पुुष्पेन्द्र रघुवंशी यांनी केल्याबद्दल युवराज पाटील व जितेंद्र पाटील यांनी संस्थाचालकांतर्फे कौतुक करण्यात आले.
