नंदुरबार l प्रतिनिधी-
राज्य उत्पादन शुल्क विभागाच्या भरारी पथकाने शहादा ते धडगाव रस्त्यावर तलावडी शिवार व उपनदेव फाट्या जवळ धाड टाकून 59 लाख 80 हजार रुपये किमतीचा अवैध गोवा बनावटीचा मद्यसाठा जप्त केला आहे. या धडक कारवाईत दोन महिंद्रा बोलेरो वाहने जप्त करण्यात आली असून एका आरोपीला अटक करण्यात आली आहे, तर एक चालक फरार झाला आहे, अशी माहिती राज्य उत्पादन शुल्क भरारी पथक निरिक्षक व्ही. ए. चौरे यांनी कळविली आहे.
गुप्त माहितीनुसार, शहादा ते धडगाव रस्त्यावरून गोवा निर्मित मद्यसाठ्याची अवैध वाहतूक होणार असल्याची बातमी राज्य उत्पादन शुल्क विभागाला मिळाली होती. त्याआधारे दुय्यम निरीक्षक एस. एस. गोयेकर (भरारी पथक) व दुय्यम निरीक्षक अ. शां. गायकवाड (बीट क्र. 02) यांच्या नेतृत्वाखालील पथकाने तलावडी शिवार व उपनदेव फाट्याजवळ (दरा शिवार) सापळा रचला. संशयितरीत्या येणाऱ्या दोन महिंद्रा बोलेरो वाहनांना (एक वाहन क्र. एमएच-05-बीडी-507 व एक विना नंबर प्लेट) अडवून तपासणी केली असता, त्यात अवैध गोवा बनावटीच्या ‘रॉयल ब्लू मार्ट व्हिस्की’ चे 180 मि.ली. क्षमतेचे एकूण 470 बॉक्स लपवून ठेवल्याचे आढळले.
या कारवाईत रॉयल ब्लू मार्ट व्हिस्की (470 बॉक्स) व 2 महिंद्रा बोलेरो वाहने असा एकूण किंमत 59 लाख 80 हजार मुद्देमाल जप्त करण्यात आला.याप्रकरणी विनोद फुलजी मोरे (वय 30 वर्ष, रा. करणपुरा, ता. पानसेमल, जि. बडवाणी, मध्य प्रदेश) याला अटक करण्यात आली.
दरम्यान दुसऱ्या वाहनाचा चालक फरार झाला. याप्रकरणी गुन्हा दाखल करण्यात आला आहे.
सदर कार्यवाही राज्य उत्पादन शुल्क आयुक्त राजेश देशमुख, सह आयुक्त (दक्षता व अंमलबजावणी) पी. पी. सुर्वे, नाशिक विभागाच्या उप आयुक्त श्रीमती यु. आर. वर्मा यांच्या मार्गदर्शनाखाली व नंदुरबारचे प्रभारी अधीक्षक अ. सु. तांबारे यांच्या नेतृत्वाखाली पार पडली.
या कारवाईत निरीक्षक व्ही. ए. चौरे, दुय्यम निरीक्षक एस. एस. गोयेकर, अ. शां. गायकवाड, पी. व्ही. मोरे, एच. पी. घरटे तसेच सहाय्यक दुय्यम निरीक्षक व जवानांनी सहभाग घेतला. गुन्ह्याचा पुढील तपास दुय्यम निरीक्षक एस. एस. गोयेकर व अ. शां. गायकवाड करत आहेत.
