नंदुरबार l प्रतिनिधी-
सोशल मीडियावर हातात तलवार घेऊन व्हिडिओ प्रसारित करत नागरिकांमध्ये भीतीचे वातावरण निर्माण करणाऱ्या एका तरुणाला नंदुरबार शहर पोलिसांनी अवघ्या काही तासांत जेरबंद केले. आरोपीच्या ताब्यातून लोखंडी तलवार जप्त करण्यात आली असून त्याच्याविरुद्ध महाराष्ट्र पोलीस अधिनियम तसेच भारतीय हत्यार अधिनियमांतर्गत गुन्हा दाखल करण्यात आला आहे.
पोलीस अधीक्षक अश्विनी सानप, अपर पोलीस अधीक्षक आशीत कांबळे यांच्या मार्गदर्शनाखाली तसेच उपविभागीय पोलीस अधिकारी हनुमंत गायकवाड यांच्या सूचनेनुसार नंदुरबार शहरात गुन्हेगारी प्रवृत्तींवर नियंत्रण ठेवण्यासाठी विशेष मोहीम सुरू आहे. त्याच मोहिमेअंतर्गत १ ऑगस्ट रोजी नंदुरबार शहर पोलिसांना हलवाई गल्ली परिसरात एक तरुण हातात तलवार घेऊन फिरत असल्याची तसेच त्याचा व्हिडिओ सोशल मीडियावर व्हायरल झाल्याची गोपनीय माहिती मिळाली.
माहितीची खातरजमा करत पोलिसांनी तातडीने घटनास्थळी धाव घेत संबंधित तरुणाला ताब्यात घेतले. तपासात त्याची ओळख कासीम मुस्ताक हलवाई (वय २७, रा. बोडगाव, ता. जि. नंदुरबार) अशी पटली. त्याच्याकडून एक लोखंडी तलवार जप्त करण्यात आली.
याप्रकरणी आरोपीविरुद्ध महाराष्ट्र पोलीस अधिनियम कलम ३७(१)(३) सह १३५ तसेच भारतीय हत्यार अधिनियम, १९५९ च्या कलम ४/२५ अन्वये नंदुरबार शहर पोलीस ठाण्यात गुन्हा दाखल करण्यात आला असून पुढील तपास सुरू आहे.
ही कारवाई प्रभारी पोलीस निरीक्षक संदीप पाटील यांच्या मार्गदर्शनाखाली पोलीस उपनिरीक्षक अमोल देशमुख, पोलीस हवालदार जगदीश पाटील तसेच पोलीस कॉन्स्टेबल रुपेश पगारे, राजेंद्र कटके, ललित गवळी, निंबा वाघमोडे आणि अमित भरवाड यांच्या पथकाने केली.
दरम्यान, नंदुरबार शहरात विनापरवानगी फिरणारे हद्दपार आरोपी तसेच चोरीचा माल बाळगणाऱ्यांविरुद्धही विशेष मोहीम राबवून कठोर कारवाई सुरू असल्याचे पोलिसांनी स्पष्ट केले.
