नंदुरबार l प्रतिनिधी-
जिल्हा रुग्णालयात नवजात बालकांच्या संगोपनासाठी “बाल कवच” हा उपक्रम आशेचा किरण ठरत असून, या उपक्रमांतर्गत नवजात शिशूंना मायेची ऊब देणाऱ्या किटचे वितरण करण्यात आले. संसदरत्न माजी खासदार डॉ. हिना गावित यांच्या हस्ते या किटचे वाटप करण्यात आले.
कर्तव्य फाउंडेशन आणि रोटरी क्लब ऑफ नंदनगरी यांच्या संयुक्त विद्यमाने राबविण्यात येणाऱ्या या उपक्रमात डॉ. हीना गावित यांची विशेष उपस्थिती लाभली. त्यांच्या हस्ते जिल्हा रुग्णालयात जन्मलेल्या नवजात बालकांना “बाल कवच” किट प्रदान करण्यात आले.
या उपक्रमाचे विशेष वैशिष्ट्य म्हणजे रुग्णालयात प्रसूती झालेल्या प्रत्येक महिलेला डिस्चार्जच्या दिवशी हे किट पूर्णपणे विनामूल्य दिले जाते. या किटमध्ये बाळासाठी आवश्यक असलेल्या गादी, तकिया, मच्छरदाणी, ड्रेस आणि ब्लॅंकेट अशा अत्यावश्यक वस्तूंचा समावेश आहे, ज्यामुळे नवजात बालकांच्या आरोग्यदायी संगोपनाला मोठा हातभार लागत आहे.
या प्रसंगी नगरसेवक हिरालाल चौधरी, प्रतीक जैन, प्रितेश बांगड, आकाश बेदमुथा, शैलेश मुलानी, महेश रघुवंशी, विजय बांगड, राहुल पाटील, राजेश्वर चौधरी यांच्यासह जिल्हा रुग्णालयातील वैद्यकीय अधिकारी व कर्मचारी उपस्थित होते.
“बाल कवच” उपक्रमामुळे गरजू कुटुंबांना दिलासा मिळत असून, नवजात बालकांच्या सुरक्षिततेसाठी हा उपक्रम प्रभावी ठरत असल्याची भावना उपस्थितांकडून व्यक्त करण्यात आली.
