नंदुरबार l प्रतिनिधी
भारतीय जनता पार्टीचे राष्ट्रीय प्रवक्त्या डॉ. हिना गावित यांनी केलेल्या पाठपुराव्यामुळे पंतप्रधान आवास योजनेतील घरकुलापासून वंचित राहिलेल्या लाभार्थ्यांची ड यादी मंजूर झाली आहे. डॉ. हिना ताई गावित यांच्या या प्रयत्नामुळे ड यादीतील 68 हजार 496 लोकांची घरकुल मंजूर झाली आहेत.
अन्न, वस्त्र, निवारा या मूलभूत गरजा भागविण्यासाठी विविध योजनांच्या माध्यमातून संसद रत्न डॉक्टर हिनाताई गावित यांनी खासदार असताना तळागाळातील गोरगरिबांना दिलेले लाभ स्मरणीय म्हणावे असेच आहे. नंदूरबार क्षेत्रात डॉ. हिना गावित यांनी पंतप्रधान आवास योजनेचा लाभ शेवटच्या व्यक्तीपर्यंत पोचविण्याचे काटेकोरपणे प्रयत्न केले. तथापि अनेक बेघर ग्रामस्थ राहिले होते.
ड यादीत त्यांचा समावेश करून लाभ मिळावा यासाठी केंद्र सरकारकडे सातत्याने डॉक्टर हिना गावित यांचा पाठपुरावा सुरू होता त्याला नुकतेच यश प्राप्त झाले आहे. याची माहिती देताना त्यांनी सांगितले की, ड यादीच्या माध्यमातून 2021 ते 2022 या वर्षातील धुळे जिल्ह्यात 18140 घरकुले मंजूर करून दिली होती. त्यातील 15,316 घरकुल उभारून पूर्ण झाले आहेत. नंदुरबार जिल्ह्यात 2021 ते 2022 या वर्षातील 18,876 घरकुलांना मंजुरी मिळाली. यातील प्रत्यक्षात 15899 घरकुल आतापर्यंत उभी राहिली असून अन्य प्रगतीपथावर आहेत.
2024 ते 25 च्या ड यादी ला सुद्धा मंजुरी मिळाली असून त्यात धुळे जिल्ह्यातील 28 हजार 767 पैकी पंधरा हजार 225 घरकुलांना मंजुरी मिळाली तर नंदुरबार जिल्ह्यातील 36 हजार 960 पैकी 16128 घरकुल मंजूर झाले आहेत. 2024-25 च्या ड यादीत अक्कलकुवा तालुक्यातील 2897, अक्राणी तालुक्यातील 1523, नंदुरबार तालुक्यातील 3739, नवापूर तालुक्यातील 2170 शहादा तालुक्यातील 4228 आणि तळोदा तालुक्यातील 1693 घरकुलांचा समावेश आहे.
