नंदुरबार l प्रतिनिधी
नंदूरबार उपनगर पोलीस ठाण्याच्या पथकाने सुगंधीत तंबाखूच्या वाहतुकीवर धडक कारवाई करीत 32 लाख 3 हजार रुपये किंमतीची सुगंधीत तंबाखूसह 2 संशयित आरोपी यांना अटक केली आहे.
नंदुरबार जिल्ह्यात महाराष्ट्रात बंदी असलेला गुटखा, सुगंधीत तंबाखुची होणारी अवैध चोरटी विक्री व वाहतुकीचे प्रमाण लक्षात घेता नंदुरबार जिल्ह्याचे पोलीस अधीक्षक पी. आर. पाटील यांनी जिल्ह्यातील सर्व पोलीस ठाणे प्रभारी अधिकारी यांना माहिती काढून सक्त कारवाई करण्याचे आदेश दिले होते.
नंदुरबार जिल्ह्याचे पोलीस अधीक्षक श्री. पी. आर. पाटील यांना गुप्त बातमीदारामार्फत बातमी मिळाली की, दि.23 एप्रिल 2023 रोजी सायंकाळी गुजरात राज्यातून नंदुरबार मार्गे अशोक लेलँड कंपनीच्या चारचाकी वाहनातून सुगंधीत तंबाखूची वाहतूक होणार आहे. सदर बातमीच्या अनुषंगाने नंदुरबार जिल्ह्याचे पोलीस अधीक्षक पी. आर. पाटील यांनी तात्काळ उपनगर पोलीस ठाण्याचे सहा. पोलीस निरीक्षक दिनेश भदाणे यांना माहिती कळवून कारवाई करणेबाबत आदेशीत केले होते.
मिळालेल्या खात्रीशीर बातमीच्या आधारे उपनगर पोलीस ठाण्याचे सहा. पोलीस निरीक्षक दिनेश भदाणे यांनी दिनांक 23 एप्रिल 2023 रोजी धानोरा ते नंदुरबार रस्त्यावर सुंददे बस स्थानकाजवळ सापळा रचला. धानोरा ता. नंदुरबार गावाकडून नंदुरबार शहराच्या दिशेने येणाऱ्या वाहनांची तपासणी करीत असतांना धानोरा गावाकडून नंदुरबार शहराच्या दिशेने एक अशोक लेलॅण्ड कंपनीचे चारचाकी वाहन भरधाव वेगाने येतांना दिसुन आल्याने पोलीस पथकातील अमलदारांनी हाताच्या सहाय्याने त्यास उभे करण्याचा इशारा देवून वाहन थांबविले. वाहनातील इसमांना त्यांचे नाव गाव विचारले असता सचिन भगवान पाटील रा. प्लॉट नं. 18 बीए शुभम पार्क, सहारा टाऊनए नंदुरबार, रत्नदिप वासुदेव पाटील ऊर्फ राकेश किशोर राजपुत रा. शिवाजी रोड, चैतन्य चौकदोशिया मशिद समोर, जळका बाजार, नंदुरबार असे सांगितले. उपनगर पोलीस ठाण्याच्या पथकांनी त्यास वाहनात काय भरले आहे ? याबाबत विचारपूस केली असता तो उडवा उडवीची उत्तरे देवू लागला. म्हणून उपनगर पोलीस ठाण्याच्या पथकांनी दोन्ही संशयीत व चारचाकी वाहन ताब्यात घेतले.
उपनगर पोलीस ठाण्याच्या पथकांनी कायदेशीर प्रक्रिया करुन वाहनांची तपासणी केली असता त्यात गोण्या दिसून आल्या. सदर गोण्या उघडून पाहिले असता त्यात महाराष्ट्रात बंदी असलेला सुगंधीत तंबाखू मिळुन आली. आरोपीतास सदरची सुगंधीत तंबाखू बाबत विचारपुस केली असता त्याने गुजरात राज्यातील निझर ता. निझर जि. तापी गुजरात राज्य येथुन विकत घेवुन ते विक्री करण्याच्या उद्देशाने घेवून जात असल्याचे सांगितले.
ताब्यात घेण्यात आलेला अशोक लेलॅण्ड कंपनीचा चारचाकी वाहन ( क्र. MH 39 AD 1877) यात, 19 लाख 16 640 रुपये किमतीच्या एकुण 44 खाकी रंगाच्या गोण्या, त्यात एकुण 9680 मोठे पाकिटे त्यावर VIMAL PAN MASALA असे लिहिलेले. 2 लाख 70 हजार 600 रुपये किमतीच्या एकुण 17 पांढऱ्या रंगाच्या गोण्या, त्यात एकुण 8200 मोठे पाकिटे, त्यावर V-1 तंबाखू असे लिहिलेले.1 लाख 32 हजार रुपये किमतीच्या एकुण 5 खाकी रंगाच्या गोण्या, त्यात एकुण 1000 लहान पाकिटे त्यावर VIMAL PAN MASALA असे लिहिलेले. 33 हजार 800 रुपये किमतीच्या एकुण 07 निळ्या रंगाच्या गोण्या, त्यात एकुण 1540 पाकिटे, त्यावर V-1 तंबाखू असे लिहिलेले. 47 हजार रुपये किमतीच्या एकुण 10 पांढऱ्या रंगाच्या प्लास्टीकच्या पिशव्या, त्यात 100 पुडे त्यावर VIMAL PAN MASALA असे लिहिलेले. 3 हजार रुपये किमतीचे एकुण 100 पुडे त्यावर V-1 TOBACCO असे लिहिलेले. 8 लाख रुपये किमतीचे अशोक लेलॅण्ड कंपनीचे चारचाकी वाहन (क्र. MH 39 AD 1877) ताब्यात घेण्यात आलेले दोन्ही संशयीत आरोपीत व एकुण 32 लाख 3 हजार 120 रुपये किमतीचा मुद्देमाल कायदेशीर प्रक्रिया करुन जप्त करण्यात आला असून उपनगर पोलीस ठाण्यात भा.द.वि. कलम 272, 273, 328 सह अन्न सुरक्षा व मानके कायदा 2006 चे कलम 26 ( 2 ) (i), 27 (3) (e) प्रमाणे गुन्हा दाखल करण्यात आला आहे.
सदरची सुगंधीत तंबाखू ही कोणाकडून विकत आणली तसेच कोणास विकण्यास जात आहे याबाबत पोलीस सखोल तपास करीत असून दोषींविरुध्द् कठोर कारवाई करण्यात येईल असे नंदुरबार जिल्ह्याचे पोलीस अधीक्षक पी. आर. पाटील यांनी सांगितले. सदरची कारवाई नंदुरबार जिल्ह्याचे पोलीस अधीक्षक पी. आर. पाटील, अपर पोलीस अधीक्षक निलेश तांबे, नंदुरबार विभागाचे उप विभागीय पोलीस अधिकारी सचिन हिरे यांचे मार्गदर्शनाखाली उपनगर पोलीस ठाण्याचे सहा. पोलीस निरीक्षक दिनेश भदाणे, सहा. पोलीस उप निरीक्षक पानाजी वसावे, पोलीस अंमलदार विलास वसावे, विपुल पाटील, बाबुराव बागुल व होमगार्ड हेमंत राजपुत यांनी केली असुन नंदुरबार जिल्ह्याचे पोलीस अधीक्षक पी. आर. पाटील यांनी संपुर्ण पथकाचे अभिनंदन केले आहे.
