नंदूरबार l प्रतिनिधी
अक्कलकुवा ते मोलगी रस्त्यावरील वालंबा गावाजवळ वाहनाने दुचाकीला धडक दिल्याने दोघांना दुखापत झाली.
याबाबत पोलिस सूत्रांनी दिलेल्या माहितीनूसार, अक्कलकुवा तालुक्यातील वेली येथील सुरेश आत्र्या वळवी व अरविंद टेट्या वळवी हे दुचाकीने (क्र.एम.एच.३९ जी २३३१) अक्कलकुवा ते मोलगी रस्त्याने जात होते. यावेळी एका वाहन चालकाने त्याच्या ताब्यातील वाहन रस्त्याच्या परिस्थितीकडे दुर्लक्ष करुन भरधाव वेगात वाहन चालवून वालंबा गावाजवळ दुचाकीला धडक दिल्याने अपघात घडला.
घडलेल्या अपघातात सुरेश वळवी व अरविंद वळवी यांना दुखापत झाली. तसेच दुचाकीचेही नुकसान झाले असून अपघातानंतर वाहन चालक घटनास्थळावरुन पसार झाला. याबाबत सुरेश वळवी यांच्या फिर्यादीवरुन मोलगी पोलिस ठाण्यात वाहन चालकाविरोधात भादंवि कलम २७९, ३३७ सह मोटार वाहन कायदा कलम १८४, १३४ (अ) प्रमाणे गुन्हा दाखल करण्यात आला आहे. पुढील तपास पोहेकॉ.अरुण सैंदाणे करीत आहेत.
