सारंगखेडा | वार्ताहर-
येथील एकमुखी दत्ताच्या यात्रोत्सवाला आठवडा झाला असून यात्रेकरुंची गर्दी कायम आहे. यात्रेतील प्रमुख आकर्षण असलेल्या अश्व बाजारात सर्वाधिक किमतीची ११ लाख रुपयांची गुजरातची पुनम नावाची घोडी आकर्षण ठरली आहे. आजपर्यंत ५५० घोड्यांची विक्रीतून २ कोटी रुपयांची उलाढाल झाली आहे.
येथील अश्वबाजारात देशाच्या कानाकोपर्यातून आतापर्यंत सर्वाधिक अश्व आले आहेत. अश्व खरेदी, विक्रीचा व्यापार वाढत आहे. सर्वाधिक घोडे तामीळनाडूतील खरेदीदारांनी खरेदी केले. त्यानंतर गुजरात, पश्चिम महाराष्ट्र, मराठवाडातील खरेदीदारांनी घेतले. यंदा उत्तरप्रदेशहून सर्वाधिक घोडे विक्रीसाठी आले आहेत.
यात्रेत खरेदीदारांची गर्दी कायम आहे. ही यात्रा अजून १५ दिवस सुरू राहील. यात्रोत्सवाच्या व्यापारातून आतापर्यंत १० कोटी रुपयांची उलाढाल झाल्याचा अंदाज आहे.
११ लाखाची ‘पूनम’
मंगळवारी अश्व बाजारात ४७ अश्वांच्या विक्रीतून २५ लाख ५० हजाराची उलाढाल झाली. आजअखेर ५५२ घोडयांची विक्रीतून २ कोटी ४ लाखाची उलाढाल झाली आहे. त्यात पुनम नावाची घोडीला ११ लाख रुपयाचा दाम मिळाला. उत्तर प्रदेशचे रिकू महाराजसिंह राजपूत यांनी ही घोडी विकली. तिचा खरेदीदार राजकोट (गुजरात) येथील जेवजीभाई सोळंकी यांनी खरेदी केली. पंचकल्याण पंजाब जातीची लाल महंवा रंगाची आहे. तिचे वय २ वर्ष आहे.
अश्व ट्रॅकवर स्टंटबाजी
अश्व ट्रॅकवर अश्वांचा सराव करतांना अनेक जण अश्वावर बसून स्टंटबाजी करतात. अश्वावर उलटे बसून, अश्व उभे राहणे, अश्वावर हात सोडून कर्तबगारी दाखवित आहेत.