नंदुरबार l
भारत निवडणूक आयोगाने नाशिक विभाग पदवीधर मतदारसंघासाठी नव्याने मतदार याद्या तयार करण्याचे निर्देश दिले आहे. त्यानुसार मतदार नोंदणीसाठी 1 नोव्हेंबर 2022 रोजीच्या अर्हता दिनांकावर आधारित मतदार नोंदणीचा पुनरिक्षण कार्यक्रम राबविण्यात येत आहे. या नव्याने मतदार नोंदणी कार्यक्रमांतर्गत सोमवार 7 नोव्हेंबर, 2022 पर्यंत दावे व हरकती स्वीकारण्याचा अंतिम दिनांक आहे.
तथापि, मुख्य निवडणूक अधिकारी यांच्या सूचनेनुसार 23 नोव्हेंबर, 2022 रोजी प्रारुप मतदार यादी प्रसिद्ध झाल्यानंतरही 23 नोव्हेंबर ते 9 डिसेंबर, 2022 या कालावधीत पुन्हा दावे व हरकती स्वीकारण्यात येणार असल्याने या कालावधीत सुध्दा पदवीधर मतदारसंघाची मतदार नोंदणी करता येणार आहेत.
तसेच 30 डिसेंबर, 2022 रोजी अंतिम मतदार यादी प्रसिद्ध झाल्यानंतरही निरंतर मतदार नोंदणी निवडणुकीसाठी उमेदवाराचा नामनिर्देशन अर्ज भरण्याच्या शेवटच्या दिवसापर्यंत करता येणार असल्याचे उप जिल्हा निवडणूक अधिकारी संजय बागडे यांनी एका प्रसिद्धी पत्रकान्वये कळविले आहे.
