नंदूरबार l प्रतिनिधी
जिल्हा परिषद अध्यक्ष व उपाध्यक्ष पदाच्या निवडणुकीत राष्ट्रवादीच्या चार सदस्यांनी घेतलेली भुमिका ही पक्षाची भुमिका नसून त्यांनी व्यक्तीगतरित्या भाजपाला समर्थन दिले. मात्र, पक्षविरोधी काम केल्याने मोहन शेवाळे यांना राष्ट्रवादी कॉंग्रेसच्या जिल्हा उपाध्यक्ष पदावरुन हटविण्यात आले असून त्यांच्यासह अन्य चारही जि.प.सदस्यांवर पक्षाच्या शिस्तपालन समितीकडे तक्रार करण्यात आली आहे, अशी माहिती राष्ट्रवादी कॉंग्रेसचे जिल्हाध्यक्ष डॉ.अभिजीत मोरे यांनी पत्रकार परिषदेत दिली. दरम्यान, निवडीप्रसंगी कॉंग्रेसकडून आम्हाला कमी लेखण्याचा प्रयत्न झाल्याचेही यावेळी त्यांनी सांगितले.
नंदुरबार जिल्हा परिषदेत राष्ट्रवादीच्या जि.प.सदस्यांच्या समर्थनानंतर भाजपाने सत्ता स्थापन केल्यानंतर याबाबत खुलासा करण्यासाठी जिल्हाध्यक्ष डॉ.अभिजीत मोरे यांनी पत्रकार परिषदेत माहिती दिली. यावेळी डॉ.मोरे म्हणाले, भाजपाने कॉँग्रेसच्या काही सदस्य व राष्ट्रवादीच्या ४ जि.प.सदस्यांच्या समर्थनानंतर सत्ता स्थापन केली आहे. मात्र यास राष्ट्रवादी पक्षाचा पाठींबा नसून याउलट या घटनेचा निषेध करत आहोत.
सन २०१९ मध्ये झालेल्या जि.प.निवडणूकीप्रसंगी जागा वाटपाबाबत समझोता झाला होता व त्यावेळी आपण जिल्हाध्यक्ष देखील नव्हतो. मात्र त्यानंतर झालेल्या पोटनिवडणूकीत महाविकास आघाडीसोबत राहणे आम्ही पसंत केले होते. नवापूर तालुक्यातील चितवी गटातून सुनिल गावित तर शहादा तालुक्यातील पाडळदा गटातून मोहन शेवाळे विजयी झाले होते. यामुळे त्यांनी महाविकास आघाडीसोबत राहणे अपेक्षित होते. मात्र स्थानिक पातळीवर पक्ष म्हणून आघाडीचा धर्म पाळला गेला नसल्याने याचा निषेध करीत आहोत. भाजप व राष्ट्रवादी या दोन्ही पक्षांची विचारधारा वेगवेगळी असून चौघा सदस्यांनी भाजपाला समर्थन दिल्याने याबाबत प्रदेश पातळीवर तक्रार दिली असल्याचे डॉ.मोरे यांनी सांगितले.
राष्ट्रवादी नेहमी महाविकास आघाडीसोबतच राहणार असल्याचेही ते यावेळी म्हणाले. शिस्त पालन समितीकडे चौघा सदस्यांबाबत अहवाल पाठविला असून प्रदेश पातळीवरुन निर्णय घेण्यात येणार असल्याचे ते म्हणाले. दरम्यान, आगामी पालिका निवडणूका समविचारी पक्षासोबत किंवा स्वबळावर लढविण्याची देखील तयारी असल्याचे डॉ.अभिजित मोरे यांनी स्पष्ट केले.
जि.प.अध्यक्ष, उपाध्यक्ष निवडणूकीदरम्यान, मोहन शेवाळे यांच्यावर राष्ट्रवादी कॉँग्रेस पार्टीच्या जिल्हा उपाध्यक्ष पदाची जबाबदारी असतांना त्यांनी भाजपाला समर्थन दिले. यामुळे त्यांना पदमुक्त केले असून याबाबत वरिष्ठ पातळीवर कळविण्यात आले असल्याचे डॉ.मोरे यांनी यावेळी सांगितले.
