तळोदा ! प्रतिनिधी
तळोदा तालुक्यातील बोरद येथील शेतकरी दत्तू रोहिदास पाटील यांच्या बोरद शिवारातील गट क्रमांक 214 मधील शेतातील उभ्या असलेल्या पपई पिकाची काठीच्या सहाय्याने एका अज्ञात माथेफिरुने, पपईचे 20-30 झाडे कापल्याच्या घटनेने शेतकऱ्यांमध्ये हळहळ निर्माण होत आहे. तसेच बोरद येथील जयसिंग चिंधा ठाकरे व बालम तुकड्या पवार यांच्या करणखेडा रस्त्याला असलेल्या शेतातील कापसाच्या पिकाची सुद्धा नासधूस करून 40-50 झाडांची कत्तल केल्याने परिसरात घबराटीचे वातावरण पसरले आहे. बोरद पोलिस दूरक्षेत्रात एका आठवड्यात दुसरी घटना घडल्याने शेतकऱ्यांकडून हळहळ निर्माण होत आहे.
सदरील घटना अशी की, सोमवार रोजी रात्री 8 ते 12 दरम्यान शेतात कुणीही नसल्याच्या अंदाज घेत एका अज्ञात माथेफिरुने, स्वतः जवळ असलेल्या काठीच्या सहाय्याने पिकाची नासधूस करत साधारण 20 ते 30 झाडांची कत्तल केली. पपईच्या पिकाला अर्ध्यापासून मोडल्याचे शेतकरी यांच्या मार्फत सांगण्यात आले. पाच-सहा महिन्याच्या पपईच्या पिकाची अशा प्रकारे नासधूस झाल्यामुळे, हातातोंडाशी आलेला घास त्या माथेफिरूने हिरावून घेतल्याने, परिसरात हळहळ निर्माण होऊन, संताप व्यक्त करण्यात येतो आहे.
याबाबत शेतमालकाने तळोदा पोलीस स्टेशन येथे दूरध्वनीद्वारे संपर्क साधला असता, एकही पोलीस कर्मचारी तेथे पहाणीसाठी उशिरापर्यंत आले नसल्याने शेतकऱ्यांना कुणी वालीच नसल्याचे बोलले जात आहे. मुळात बोरद दूरक्षेत्रात पोलीस कर्मचारी हजर रहाणे अपेक्षित असतांना तेथे एकही कर्मचारी हजर नसल्याने परिसरातील नागरिकांनी नाराजी व्यक्त केली आहे.
सदरील शेतकऱ्याने एप्रिल महिन्यांत पपई पिकाची लागवड केली आहे. त्यामुळे सहा महिन्याच्या पपईला बऱ्यापैकी फळ व फुल्लर आल्याने चांगल्या प्रकारे उत्पन्न निघाले असते. परंतु सदरील शेतकऱ्यांच्या अपेक्षांवर पाणी फिरले असून, हातातोंडाशी आलेला घास गेल्याने सदरील शेतकरी कुटुंब हवालदिल झाले आहे. तसेच त्याच वेळे दरम्यान कळमसरे रस्त्यावर सुद्धा कापसाचे झाडे छाटल्याने दिवसेंदिवस घटनांमध्ये वाढ होतांना दिसून येत आहे. अशाच प्रकारची घटना मागील आठवड्यात मोड येथील भगवान लोहार यांच्या कळमसरे शिवारात सुद्धा घडल्याने शेतकरी भयभीत झाले आहेत. त्याबाबत गुन्हा सुद्धा नोंदविण्यात आला आहे. परंतु अद्यापपावेतो माथेफिरूचा तपास लागला नसल्याने पुन्हा-पुन्हा अशाच घटनांचे सत्र वाढतच चालले आहे. अशा दोषींचा वेळेवर शोध लागत नसल्याने, अनेक शेतकरी तक्रार देण्यासाठी पुढे येत नसल्याचे चित्र आहे. त्यामुळे अज्ञात माथेफिरूचा शोध घेण्यासाठी श्वान पथकाची मदत घेऊन, दोषींवर कठोर कार्यवाही करण्याची मागणी जोर धरू लागली आहे. तसेच रात्रीची गस्त वाढविण्याची मागणी जोर धरू लागली आहे.
