म्हसावद l प्रतिनिधी
वन्यजीव संस्था नंदुरबारच्या सदस्यांनी 45 फूट खोल असलेल्या कोरड्या विहीरीत आठ दिवसापासून पडलेल्या कुत्र्याला दोन तासाच्या अथक परिश्रमानंतर सुखरूप काढून जीवदान दिल्याचे चांगले काम केले आहे.
याबाबत वृत्त असे की,बुडीगव्हाण ते पाडळदा दरम्यान एक कोरडी विहीर आहे.या विहीरीजवळच रस्त्यालगत डबर पिचिंगचे काम सुरू आहे. त्या कामावर उपस्थित असलेले अभियंता राहूल चौधरी यांच्या निदर्शनात आले की,कोरड्या विहीरीत कुत्रा पडलेला आहे.त्यांनी त्वरीत वन्यजीव संस्थेचे सदस्य सुधाकर पाटील, किरण चौधरी यांचे संपर्क साधून कळवले. त्यानुसार वन्यजीव संस्था नंदुरबारचे अध्यक्ष सागर निकुंभे यांचेशी संपर्क साधून सदस्यांना कळविण्यात आले.योगायोगाने त्या दिवशी जागतिक वन्यजीव संवर्धन दिवस होता.सारंगखेडा,शहादा,म्हसावद,दोंडाईचा येथील सदस्यांनी नियोजन केले.वन्यजीव संस्था नंदुरबारचे अध्यक्ष सागर निकुंभे यांच्या मार्दर्शनाखाली निलेश वाघ,देवेंद्र वसईकर,चेतन पाटील, सुधाकर पाटील, किरण चौधरी यांनी 45 फुट खोल असलेल्या कोरड्या विहीरीत उतरून आठ दिवसापासून पडलेला कुत्र्याला वाचविण्याचा प्रयत्न सुरू केला.मात्र आठ दिवसापासून भुकेला,तहानलेला असूनही पोळी,भाकर खात नव्हता मात्र मारहाण करतील या भितीने कुत्रा चवताळून अंगावर धावून येत होता.तरीही अथक परिश्रम घेवून तब्बल दोन तासानंतर त्या कुत्र्याला विहीरीबाहेर सुरक्षीत काढण्यात यश आले.रहीम बेलदार संजय वानखेडे,निलेश नाईक,विशाल ठाकरे,आकाश कोळी,अजय कोळी,सागर राजपुत,शोएब मन्यार यांनी विहीरीबाहेर थांबून सदस्यांना विहीरीत उतरण्यासाठी व बाहेर येण्यासाठी परीश्रम घेतले. केलेल्या कामगिरीचे कौतूक करण्यात येत आहे.
