म्हसावद l प्रतिनिधी
राज्य लोकसेवा आयोगामार्फत भरण्यात येणाऱ्या पदांसाठी संघ लोकसेवा आयोगाच्या धर्तीवर अनुसूचित जमातीच्या उमेदवारांना शारीरिक क्षमता चाचणीत ५ से.मी.सूट देऊन उंचीतील फरक दूर करण्याबाबतचे निवेदन अक्कलकुवा तहसिलदार मार्फत सचिव महाराष्ट्र लोकसेवा आयोग यांना देण्यात आले.
या निवेदनात म्हटले आहे की,केंद्र सरकारच्या कार्मिक व प्रशिक्षण विभागाने संघ लोकसेवा आयोगाच्या मार्फत भरण्यात येणाऱ्या भारतीय पोलीस सेवा ,भारतीय रेल्वे प्रोटेक्शन फोर्स गट अ, आणि इतर केंद्रीय पोलीस सेवा अंतर्गत होणाऱ्या गट अ आणि गट ब च्या पदभरतीसाठी शारीरिक क्षमता चाचणी मध्ये १६५ से.मी. उंची अनिवार्य केलेली आहे.परंतू यात अनुसूचित जमाती प्रवर्गाच्या उमेदवार पुरुषासाठी १६० से.मी.व महिला साठी १४५ से.मी. अशी दोघांनाही पात्रतेसाठी ५ से.मी.ची सूट दिलेली आहे.
महाराष्ट्र राज्यात राज्य लोकसेवा आयोगामार्फत भरल्या जाणाऱ्या पोलीस उपअधिक्षक /सहायक पोलीस आयुक्त,अधिक्षक राज्य उत्पादन शुल्क, सहायक प्रादेशिक परिवहन अधिकारी, पोलीस निरीक्षक/ पोलीस उपनिरीक्षक अधिकारी अशा विविध पदासाठी सुद्धा केंद्र सरकारच्या संघ लोकसेवा आयोगाच्या धर्तीवर १६५ से.मी.उंची अनिवार्य केलेली आहेत.
मात्र संघ लोकसेवा आयोगाने अनुसूचित जमाती प्रवर्गाच्या उमेदवारांसाठी उंचीत ५ से.मी.सूट दिलेली आहे.परंतू राज्य लोकसेवा आयोगात तशी सूट देण्यात आलेली नाही. त्यामुळे थोड्याफार फरकाने अनुसूचित जमातीचे बहुतांश उमेदवार राज्य लोकसेवा आयोगाद्वारे घेण्यात येणाऱ्या शारीरिक क्षमता चाचणीत अपात्र ठरतात.संघ लोकसेवा आयोग व राज्य लोकसेवा आयोग यांच्यात अनुसूचित जमाती उमेदवारांच्या बाबत शारिरीक चाचणीत उंची मध्ये ५ से.मी.ची स्पष्ट तफावत आहेत. ही तफावत दूर करुन संघ लोकसेवा आयोगाच्या धर्तीवर ,राज्य लोकसेवा आयोगातही अनुसूचित जमाती प्रवर्गाच्या पुरुष व महिला उमेदवारांना ५ से.मी.सूट देण्यात यावी.अशी माहिती नंदुरबार ट्रायबल फोरमचे जिल्हाध्यक्ष नितीन तडवी, जिल्हा कोषाध्यक्ष वसंत वसावे,
मनिष वसावे, जितेंद्र पाडवी,अनिल वसावे,रवी पावरा, दिनेश तडवी, ,वसंत , महेश वळवी (जिल्हा प्रसिद्धीप्रमुख) आदी उपस्थित होते.
