दोन दुचाकींची समोरासमोर धडक ,अपघातात महिला ठार तर दोघे जखमी

नवापूर l प्रतिनिधी
धुळे सुरत राष्ट्रीय महामार्ग क्र. सहावर चिंचपाडा गावातील वळण रस्त्यावर दोन मोटारसायकलिंची जोरदार धडक झाली.या अपघातात दोन पुरुष व एक महिलेला गंभीर दुखापत झाली होती. दरम्यान उपचारादरम्यान महिलेचा मृत्यू झाला.

याबाबत अधिक माहिती अशी की, नवापुर तालुक्यातील चिंचपाडा येथील राष्ट्रीय महामार्गावर वळण रस्त्यावर मोटारसायकल (क्र.जी.जे.१९, आर. १३१८) वर दिनेश शांतू गावित व ईकुता दिनेश गावित (वय 23 ) दोन्ही पती पत्नी रा काळंबा, नवापूर येथून जामनपाडा येथे ईकुंता गावित यांच्या माहेरी शेतीसाठी कांद्याचे रोप घेण्यासाठी आले असता आपले काम आटपून नवापूर जवळील काळंबा येथे आपल्या गावी जात असताना समोरील मोटरसायकल (क्र.एम. एच. ३९, ए.जी. ७२५०) स्वार धनंजय शांता गावित रा. बेडकी हा नवापूरहुन विसरवाडीच्या दिशेने येत असताना, चिंचपाडा येथे दोन्ही मोटरसायकलीची समोरासमोर धडक झाल्याने हा अपघात घडला त्यात महामार्गावर एका मोठ्या वाहनाची ही धडक बसल्याची चर्चा आहे. या तिन्ही अपघातग्रस्तांना १०८ रुग्णवाहिकेतून उपचारासाठी विसरवाडी ग्रामीण रुग्णालयात पाठविण्यात आले असता दिनेश गावित यांच्या हाताला व ईकुंता गावित यांच्या कमरेला व पायाला गंभीर दुखापत झाली असून समोरील दुचाकी स्वार धनंजय गावित याच्या पायाला व डोक्याला गंभीर इजा झाल्यामुळे पुढील उपचारासाठी त्यांना नंदुरबार जिल्हा रुग्णालयात हलविण्यात आले. उपचारा दरम्यान ईकुंता गावित या महिलेचा मृत्यू झाला.