नंदुरबार l प्रतिनिधी
नंदूरबार जिल्ह्यातील नायलॉन मांजा विक्रीस प्रतिबंध असतांनाही त्याची विक्री करतांना आढळलेल्या दहा नायलॉन मांजा विक्रेत्यांवर गुन्हे दाखल करण्यात आले आहेत. त्यांच्याकडून १२ हजार १९० रुपयांचा मुद्देमाल हस्तगत करण्यात आला आहे.
नंदुरबार जिल्हालगत असलेल्या गुजरात राज्यासह संपूर्ण भारतात मकरसंक्रांतीचा पतंगोत्सव उत्साहात साजरा करण्यात येतो. यात अनेकजण नायलॉन मांजा वापरामुळे निसर्गातील बरेच पशु, पक्षी वेळप्रसंगी लोकांना दुखापत होवुन आपला जिवदेखील गमवावा लागला आहे. अशा प्रकारच्या पतंग उडविण्याच्या धाग्यामुळे प्राणघातक इजांपासुन पक्षी व मानव जिवितांस सरंक्षण करण्याची गरज आहे. पतंग उडवितांना केलेल्या नायलॉन मांजाच्या वापरामुळे विजेच्या तारांवर घर्षण होऊन आग लागणे, उपकेंद्र बंद पडणे, वीज उपकरणे बिघडणे, अपघात घडणे, इजा व जीवीत हानी होणे अशा घटना घडण्याची शक्यता नाकारता येत नाही. यामुळे नायलॉन मांजा विक्रीवर बंदी घालण्यात आली आहे. असे असतांना नंदुरबार शहरासह तळोदा, धडगांव व अक्कलकुवा येथे नायलॉन मांजा विक्री करतांना मिळुन आल्याने १० जणांविरुध्द गुन्हे दाखल करण्यात आले आहेत. त्यांच्याकडून १२ हजार १९० रुपये किंमतीचा नायलॉन मांजा जप्त करण्यात आला आहे. तसेच नायलॉन मांजाची किरकोळ विक्री किंवा प्रमुख विक्रेत्याचा शोध घेवुन त्यांचेवर पर्यावरण (सरंक्षण) अधिनियम १९८६ च्या कलमान्वये कारवाई करण्यात येईल. त्याचप्रकारे ज्या वस्तूंपासुन पर्यावरणास हानी पोहचेल असेल असे नायलॉन मांजाची विक्री, साठवणुक किंवा हाताळणी करणाऱ्यांवर देखील कारवाई करण्यात येईल असा इशारा जिल्हा पोलीस अधीक्षक पी. आर. पाटील यांनी दिला आहे.
