तळोदा l प्रतिनिधी
तळोदा येथील श्रीराम नगर येथील बिल्डिंग मटेरियल सप्लायर्सचे मालक दिपक भापकर यांच्या घरातुन अज्ञात चोरट्याने एक लाखाची रोकड लंपास केल्याची घटना घडली असून तळोदा पोलीस ठाण्यात अज्ञायाविरुद्ध गुन्हा दाखल करण्यात आल आहे.
याबाबत पोलीस सूत्रांनी दिलेल्या माहितीनुसार, तळोदा येथील श्रीराम नगर येथील रहिवासी दीपक मुरलीधर भापकर यांच्या घरात दि .९ जानेवारीच्या मध्यरात्रीच्या सुमारास घर मालक बाहेर गावी असल्याचा फायदा घेऊन कोणीतरी अज्ञात चोरट्याने घराचे लाकडी दरवाजाचे कडीकोयंडा तोडून घरात प्रवेश करून बेडरूममधील लोखंडी कपाटाचे लॉकर तोडून कपाटात ठेवलेले ५०० रुपयाचा १२० नोटा असे ६० हजार रु रोख, व २०० रु च्या २० नोटा असे ४० हजार रुपये रोख असा एकूण 1 लाख रुपयांची रोख रक्कम अज्ञात इसमाने लंपास केल्याची घटना घडली आहे. दरम्यान पोलीस उपनिरीक्षक अमितकुमार बागुल, यांच्यासह पो.उपनिरीक्षक अविनाश केदार, वाहतूक पो.विलास पाटील, सुभाष पावरा यांनी घटनास्थळी भेट देऊन पाहणी केली. नंदुरबार येथून फॉरेन्सिक पथक दाखल झाले होते दरम्यान त्यानी ठष्याचे नमुने घेतले आहेत. दिपक मुरलीधर भापकर यांच्या फिर्यादीवरून तळोदा पोलीस ठाण्यात भादवि कलम ३८०, ४५४, ४५७ प्रमाणे गुन्हा दाखल करण्यात आला आहे. पुढील तपास पोलीस निरीक्षक केलसिंग पावरा यांच्या मार्गदर्शनाखाली सहाय्यक पोलिस उपनिरीक्षक अमितकुमार बागुल हे करीत आहेत.
वाढत्या चोऱ्यामुळे शहरातील नागरिकांना देखील आपले घर बंद करून एखादा दिवस बाहेरगावी जाणेही चिंतेचे वाटत आहे. बाहेरगावी गेल्यानंतर माघारी येईपर्यंत आपल्या घरातील किंमती वस्तू सुरक्षित राहतील की नाही याची सतत काळजी असते. केवळ घरच नव्हे तर गेल्या काही दिवसांमध्ये दुकाने फोडण्याचा चोरट्यांनी सपाटाच लावला असल्याने व्यापारी वर्ग देखील चिंतेत आहे. चोऱ्या होऊन पोलिसांना चोर सापडतच नसल्याने नागरिकांमध्ये भितीचे वातावरण निर्माण झाले आहे . गेली काही महिने चोरट्यांनी बंद दुकाने व घरांना लक्ष्य करून रोकड आणि किंमती मुद्देमाल लंपास केला आहे. चोरी झाल्यानंतर चोरटे सापडतील आणि चोरीस गेलेला ऐवज मिळेल या आशेपोटी नागरिक पोलिस ठाण्यात धाव घेतात, मात्र त्यांच्या हाती निराशाच लागत आहे.
दरम्यान मागील तीन दिवसांपासून सातत्याने तळोदा शहरात होत असलेल्या चोऱ्यांमुळे तळोदा पोलिसांच्या कार्यक्षमतेवर प्रश्नचिन्ह उपस्थित करण्यात येत आहे. पोलिसांनी गति चक्र फिरवून तातडीने या चोरांचा बंदोबस्त करण्याची मागणी आता जोर धरू लागली आहे.
