नंदुरबार l प्रतिनिधी
धडगाव तालुक्यातील मोडलगाव येथुन नंदुरबार तालुक्यातील लोय पिंपलोद येथे मिरची तोडणीसाठी येणाऱ्या मजुरांचे वाहन टेंबरीबारी घाटातून येत असताना वाहन दरीत कोसळल्याने अपघात घडला.यात तीन मजुरांचा मृत्यू झाला असून बारा जण जखमी झाले आहेत. उदरनिर्वाहासाठी जाणाऱ्या मजुरांवर काळाने झडप घातल्याने सदरच्या दुर्दैवी घटनेने सर्वत्र हळहळ व्यक्त करण्यात येत आहे.मयतांमध्ये माय लेकासह बालकाचा समावेश आहे.
याबाबत सूत्रांनी दिलेल्या माहितीनुसार, धडगाव तालुक्यातील विरसिंग रायजा वळवी हा त्याच्या ताब्यातील पिकअप वाहनातून मोडलगाव येथून मजुरांना मिरची तोडणीसाठी नंदुरबार तालुक्यातील लोय-पिंपलोद येथे आणत होता.यावेळी गोरंबा गावाच्या शिवारातील टेंबरेबारी घाटात कच्च्या रस्त्यावर अतितीव्र चढावावर त्याचा वाहनावरील ताबा सुटल्याने वाहन दरीत कोसळले. घडलेल्या अपघातात तीन जण जागीच ठार झाले. यामध्ये वंतीबाई फत्या पटले (वय 37 वर्ष) विक्रांत फत्या पटले (वय 9 वर्ष) व सांगल्या सिपा वसावे (वय 10 वर्ष) यांचा मृत्यू झाला तर जखमींमध्ये हिरा फेरंग्यां पाडवी, जगिला दिल्या नाईक, सविता किरता नाईक, जयसिंग लाला नाईक, ललिता कीरता चौधरी, सांगा किरता चौधरी, सुनीता किल्या नाईक, संजय कागडा पाडवी, फेरंग्या खाल्या पाडवी, रोहित वजरे वसावे, सिपा कालश्या वसावे यांच्यासह आदीचा समावेश आहे.
जखमींना 108 क्रमांकाच्या रुग्णवाहिकेच्या मदतीने धडगाव ग्रामीण रुग्णालयात उपचारासाठी आणण्यात आले. बारा जखमींपैकी एकाच्या डोक्याला जबर मार लागल्याने त्याची प्रकृती चिंताजनक आहे. अपघातात मयत झालेल्यांपैकी एक महिला व दोन बालकांचा समावेश आहे.
गोरबा गावाच्या शिवारातील टेंबरीबारी घाटात सदरचा अपघात घडल्यावर घटनास्थळी मोठी गर्दी झाली होती.स्थानिक नागरिक व पोलिसांच्या मदतीने जखमींना धडगाव रुग्णालयात दाखल करण्यात आले दरम्यान सदरचा दुर्दैवी अपघात घडल्याने मोडल गावावर शोककळा पसरली असून हळहळ व्यक्त करण्यात येत आहे. या प्रकरणी पूजा कोमलसिंग पाडवी यांच्या फिर्यादीवरून वाहन चालक वीर सिंग वळवी याच्या विरोधात धडगाव पोलीस ठाण्यात भांदवी कलम 304(अ), 279, 337, 338, 427 मोटार वाहन कायदा कलम 134/187 प्रमाणे गुन्हा दाखल करण्यात आला आहे.
