नंदुरबार : धडगाव तालुक्यातील सोनखुर्दे अक्कलकुवा तालुक्यातील कोराई येथे अवैधरित्या पेट्रोल-डिझेल सदृष्य द्रव्य विक्री व साठवणूक केल्याप्रकरणी दोघांविरूद्ध गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, धडगाव तालुक्यातील सोनखुर्दे येथील गोविंद डेमश्या पावरा हा एका झोपडीच्या आडोश्याला अवैधरित्या ज्वालाग्रही पेट्रोल सदृष्य द्रव्य विक्री करतांना आढळून आला. पोलिसांनी त्याच्याकडून ५५० रुपये किंमतीचे पाच लिटर द्रव्य जप्त केले. याबाबत पोशि.प्रतापसिंग गिरासे यांच्या फिर्यादीवरुन धडगाव पोलिस ठाण्यात गोविंद पावरा याच्याविरोधात भादंवि कलम २८५ प्रमाणे गुन्हा दाखल करण्यात आला आहे. पुढील तपास पोहेकॉ.वळवी करीत आहेत. तसेच अक्कलकुवा तालुक्यातील खापर येथील राहूल मोहन चित्रकथे याने अंकलेश्वर-बऱ्हाणपूर महामार्गावरील कोराई गावाजवळ एका चिंचेच्या झाडाजवळ अवैधरित्या ज्वालाग्रही पदार्थाची साठवणूक केल्याचे आढळून आले. पोलिसांनी त्याच्याकडून ८ हजार रुपये किंमतीचे १०० लिटर बायोझिडल सदृष्य पदार्थ जप्त केले आहे. याबाबत पोना.अमोल खवळे यांच्या फिर्यादीवरुन अक्कलकुवा पोलिस ठाण्यात राहूल चित्रकथे यााच्याविरोधात भादंवि कलम २८५, १८८ प्रमाणे गुन्हा दाखल करण्यात आला आहे. पुढील तपास पोलिस उपनिरीक्षक काळे करीत आहेत.
