नंदूरबार l प्रतिनिधी
म्हसावद ता. शहादा येथील सेंट्रल बॅँक ऑफ इंडियाच्या शाखेतून स्थावर मालमत्ता गहाण ठेवून तिच्यावर कर्ज घेत कर्जाची परतफेड न करता सदरची मालमत्ता परस्पर विक्री करीत बॅँकेची ४ लाख ४५ हजार ४०५ रुपयांची फसवणूक केल्याप्रकरणी शहादा येथील नितीन नगरमधील एका संशयिताविरोधात पोलीस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, शहादा येथील नितीन नगरमधील रहिवासी माधवराव नगीनदास पोतदार यांनी दि. १५ नोव्हेंबर २०१२ रोजी शहादा तालुक्यातील म्हसावद येथील सेंट्रल बॅँक ऑफ इंडियाच्या शाखेत नोंदणीकृत मालमत्ता असलेला प्लॉट क्र.२५ ए सर्व्हे क्र.२०/१/१ गहाण खत करुन बॅँकेतून ६ लाख ५० हजार रुपये कर्ज घेतले होते. सुरुवातीला माधवराव पोतदार यांनी कर्जाचे काही हप्ते भरले. मात्र त्यानंतर उर्वरित ४ लाख ४५ हजार ४०५ रुपये इतक्या रकमेचे हप्ते भरले नाहीत व सदर मालमत्तेवर कोणत्याही प्रकारचा बोझा न चढू देता ती विक्री केली. पोतदार यांनी गहाणखत केलेल्या जागेचे दस्तावेज यावर कर्जाचा बोझा न चढू देता ती परस्पर विक्री करुन बॅँकेची फसवणूक केली. याबाबत म्हसावद येथील सेंट्रल बॅँक इंडियाचे व्यवस्थापक किरण शिवाजी सावंदे यांच्या फिर्यादीवरुन माधवराव पोतदार यांच्याविरोधात तळोदा पोलिस ठाण्यात भादंवि कलम ४२०, ४०६, ४६७, ४६८ प्रमाणे गुन्हा दाखल करण्यात आला आहे. पुढील तपास पोलिस उपनिरीक्षक सुनिल बिर्हाडे करीत आहेत.
