नंदुरबार l प्रतिनिधी
जिल्ह्यातील शिक्षकांच्या प्रलंबित मागण्यांवर साधक बाधक तोडगा काढण्यासाठी मुख्य कार्यकारी अधिकारी रघुनाथ गावडे यांच्या अध्यक्षतेखाली प्राथमिक शिक्षक संघटनांच्या प्रतिनिधींशी व्यापक बैठक जिल्हा परिषदेच्या याहमोगी सभागृहात आयोजित करण्यात आली आहे.
नंदुरबार जिल्हा परिषद अंतर्गत कार्यरत असलेल्या शिक्षकांच्या विविध संघटनांतर्फे जिल्हा परिषदेचे मुख्य कार्यकारी अधिकारी रघुनाथ गावडे यांना वेळोवेळी विविध मागण्यांबाबत निवेदन सादर करण्यात येतात. सर्व संघटनांनी सादर केलेल्या वेगवेगळ्या मागण्यांबाबत सत्वर निर्णय घेणे प्रशासनाला सुकर व्हावे यासाठी जिल्हा परिषदेने जिल्ह्यातील सर्वच शिक्षक संघटनांच्या प्रतिनिधींना चर्चेसाठी बोलाविले आहे. जिल्ह्यातील शिक्षकांच्या सर्व प्रलंबित मागण्यांबाबत साधक-बाधक निर्णय घेणे सोपे व्हावे, हा यामागचा हेतू असल्याचे सांगण्यात आले. जिल्हा परिषदेच्या शिक्षण विभागाने गेल्या तीन महिन्यांपासून जीवन वेतन नियमित करून शिक्षकांचा मोठा प्रश्न मार्गी लावलेला आहे. तरीसुद्धा शिक्षकांचे अनेक प्रश्न अद्याप प्रलंबित आहेत. शिक्षकांच्या जीपीएफ चा विषय असेल, वैद्यकीय बिले, सर्व शिक्षा अभियान अंतर्गत बांधकाम, शिक्षकांच्या पदोन्नती, जिल्ह्यातील शिक्षकांची सेवा जेष्ठता यादी, सातव्या वेतन आयोगाचा हप्ता, एक स्तर वेतन श्रेणी असे अनेक प्रश्न प्रलंबित आहेत.
प्राथमिक शिक्षकांच्या या सर्व प्रलंबित प्रश्नांच्या संदर्भात चर्चा करण्यासाठी दि. १७ डिसेंबर २०२१ रोजी सकाळी ११ वाजता जिल्हा परिषदेच्या याहामोगी सभागृह ही बैठक आयोजित केली आहे. या बैठकीस कोविड १९ प्रादुर्भाव लक्षात घेता संघटनांचे अध्यक्ष व सचिव अथवा त्यांनी प्राधिकृत केलेला प्रतिनिधी यांनीच उपस्थित राहावे. तसेच प्रलंबित प्रश्नांच्या संदर्भात मुद्देसुद व थोडक्यात आपले म्हणणे मांडावे, अश्या आशयाचे पत्र मुख्य कार्यकारी अधिकारी रघुनाथ गावडे ( भाप्रसे ) यांनी जिल्ह्यात कार्यरत असलेल्या शिक्षक संघटनांच्या अध्यक्षांना दिले आहे.
या बैठकीला मुख्य कार्यकारी अधिकारी रघुनाथ गावडे यांच्यासह शिक्षणाधिकारी डॉ. राहुल चौधरी, उपशिक्षणाधिकारी भानुदास रोकडे, डॉ. युनूस पठाण, प्रशासन अधिकारी सुभाष मारनर यांच्यासह शिक्षण विभागातील कर्मचारी उपस्थित राहणार आहेत.
