नंदुरबार | प्रतिनिधी
नंदुरबार शहरातील चिराग गल्ली परिसरात घराच्या छतावर लपवून ठेवलेल्या सात धारदार व टोकदार तलवारी स्थानिक गुन्हे शाखेने छापा टाकून जप्त केल्या. या कारवाईत तब्बल २४ हजार रुपये किमतीचा मुद्देमाल हस्तगत करण्यात आला असून, अदनान खान सफदर खान पठाण (वय ३०, रा. चिराग गल्ली, नंदुरबार) याच्याविरुद्ध भारतीय हत्यार कायद्यान्वये गुन्हा दाखल करण्यात आला आहे.
स्थानिक गुन्हे शाखेचे पोलीस निरीक्षक हेमंत पाटील यांना नंदुरबार शहरातील चिराग गल्ली परिसरात अदनान खान सफदर खान पठाण याच्या राहत्या घराच्या छतावर धारदार लोखंडी तलवारी बेकायदा लपवून ठेवण्यात आल्याची माहिती मिळाली. माहितीची खातरजमा करून पोलिसांच्या पथकाने दोन पंचांसमक्ष संबंधित ठिकाणी छापा टाकला.
यावेळी आरोपीच्या घराच्या छतावर असलेल्या कबुतरखान्याच्या बाजूला पाण्याच्या टाकीच्या आडोशाला एकूण सात लोखंडी धारदार व टोकदार तलवारी लपवून ठेवलेल्या आढळून आल्या. पोलिसांनी या सर्व तलवारी ताब्यात घेतल्या. जप्त करण्यात आलेल्या मुद्देमालाची एकूण किंमत २४ हजार रुपये असल्याचे पोलिसांनी नमूद केले आहे.
शहरातील वर्दळीच्या परिसरात अशा प्रकारे धारदार शस्त्रे लपवून ठेवण्यात आल्याने परिसरात खळबळ उडाली आहे. तलवारी नेमक्या कोणत्या उद्देशाने साठवून ठेवण्यात आल्या होत्या, याबाबत पुढील तपासात माहिती समोर येण्याची शक्यता आहे.
या प्रकरणी अदनान खान सफदर खान पठाण याच्याविरुद्ध भारतीय हत्यार कायदा कलम ४/२५ अन्वये कायदेशीर कारवाई करण्यात आली आहे.
कारवाई पथक
पोलीस उपनिरीक्षक विकास गुंजाळ, मुकेश पवार, पोलीस हेड कॉन्स्टेबल दिनेश चित्ते, जितेंद्र पाडवी, सुनील येलवे, चेतन साळवे, पोलीस शिपाई मनोज महाजन, विनोद पाटील, रामेश्वर चव्हाण, हेमंत बारी, कल्पेश मोरे, अभय राजपूत तसेच महिला पोलीस शिपाई रोहिणी धनगर यांच्या पथकाने ही कारवाई केली.
